नेपाली सम्पर्क समिति कोरियाको राहत कोष स्थापनार्थ छलफल कार्यक्रम सम्पन्न |

सौल  –  नेपाली सम्पर्क समिति कोरिया द्वारा यहि नोभेम्बर १५ तारिख आइतबारका दिन  सौल स्थित सिन्सल दोंग मा रहेको नेपाल हाउसमा आयोजित आपतकालीन राहत कोष स्थापनार्थ छलफल कार्यक्रम तथा दिपावलीको अवसरमा शुभकामना आदानप्रदान कार्यक्रम सम्पन्न भएको छ |

नेपाली सम्पर्क समिति कोरियाकी  कार्यबाहक अध्यक्ष अन्जु केसी को अध्यक्षतामा सचिब सुन्दर लिम्बुले संचालन गरेको कार्यक्रममा दक्षिण कोरियाका लागि नेपाली राजदुत महामहिम कमान सिंह लामाको प्रमुख आतिथ्यता रहेको थियो | बिशेष अतिथिहरुमा  एन आर एन ए का आई सी सी प्रतिनिधि के पी सिटौला,  एन आर एन ए कोरियाका अध्यक्ष राजु क्षेत्री, नेपाल आदिबासी जनजाती महासंघको निवर्तमान अध्यक्ष भक्त शेरचन , प्रबासी नेपाली मंच कोरियाका अध्यक्ष गोबिन्द गाउले,जन अधिकार मंचका कार्यबाहक अध्यक्ष गणेश कालिकोटे , पत्रकार महासंघ कोरियाका प्रतिनिधि  रंजन कुँवर, वुमन फर वुमन कि अध्यक्ष मल्लिका थकाली ,अतिजम बालबालिका सहयोग अभियान का संयोजक बिक्रम ठकुरी , गुल्मी सम्पर्क समिति का अध्यक्ष प्रेम ज्ञवाली लगायतका रहेका थिए | अन्य अतिथिहरुमा विभिन्न २ दर्जन संघ संस्थाको अध्यक्ष तथा प्रतिनिधिहरु रहेका थिए | स्वागत मन्तब्य उपाध्यक्ष भुवन बस्नेतले गरेका थिए भने राहत कोषको अबधारणा समितिका सदस्य किरण जी सी ले प्रस्तुत गरेका थिए | राहतकोष को लागि नेपाली सम्पर्क समितिले तिस लाख वोन बिनियोजन गरि सकेको र सोहि रकमबाट शुरुवाट हुनेगरी अभियान संचालन गरिने जी सी ले बताए |

बिशेष गरेर कोरियामा कार्यरत नेपालीहरुको अकालमा मृत्यु हुने, प्राणघाटक रोग लाग्ने ,औधोगिक दुर्घटना परि अङ्गभङ्ग हुने, आत्महत्या गर्ने ,मानसिक रोग लाग्ने लगायतका बिबिध समस्यालाई सहयोग गर्न को लागि आपतकालिन राहत कोषको स्थापना गर्ने उद्देश्यका साथ आयोजना गरिएको छलफल  कार्यक्रम मा  उद्देश्य आफैमा राम्रो भएको बक्ताहरुले वताए | यो उद्देश्य लाई पुरा गर्न को लागि राजदूतावास, एन आर एन ए , राजनीतिक संस्था ,जातिय संस्था, क्षेत्रीय संस्था ,ब्यापारी , बिधार्थी र मजदुर सबैलाई समेटेर लैजानु पर्ने मा प्रबासी नेपाली मंच कोरियाका अध्यक्ष गोबिन्द गाउलेले जोड गरे| यस राहत कोष को लागि पटक पटक अन्तरक्रिया , छलफल र बैठक बसेर स्पस्ट नीति , बिधि , नियम बनाएर कार्यन्वयन गर्नु पर्नेमा जोड गर्दै आफु र आफ्नो संस्थाको पूर्ण सहयोग समर्थन रहने उपस्थित संस्थाका प्रमुखहरुले बताए |