नेपाली संगीतकी आभा
दक्षिण कोरिया ः जति सरल स्वभावकी छिन् त्यति नै सालिन व्यक्तित्व झल्कन्छ उनमा । मिठो बोली, अनि सुमधुर स्वरकी धनी आभा मुकारुङ नेपाली गीतसंगीत क्षेत्रकी चर्चित गायिका हुन् । २०५४ सालबाट नेपाली गीतसंगीतमा निरन्तर लागिरहेकी गायिका मुकारुङ आफना जादूमय स्वरका कारण हरेक नेपालीको मुटुमा बस्न सफल भएकी छिन् । लोक, आधुनिक, स्वदेशगान, भजन र विभिन्न भाषाभाषीका चलचित्रको गीत गरी तीनसय भन्दा बढी गीतमा स्वर भरिसकेकी आभा भविष्यमा विभिन्न जातजातिको संस्कृति झल्कने गीत गाउने योजना रहेको बताउँछिन् ।
उनका अधिकांश पूर्वेली लोकभाकाका गीतहरु चर्चित छन् । यद्यपि रामकृष्ण वान्तवाको शब्द र राजु सिंहको संगीत रहेको ‘कता हिडेको कसलाई खोजेको, भन न भन ए बिरानो परदेशी’ बोलको गीतले उनलाई एकैचोटी चर्चाको शिखरमा पु¥यायो । उक्त गीत ६४ सालको हिट्स एफएम अवार्डमा समेत नोमिनेसनमा परेको थियो । २०६० सालतिर चौतारी समूहबाट ‘मनकी रानी’ एल्वममा रामचन्द्र काफ्लेसँग गाएको ‘काली पारी दाई’ बोलको गीत पनि त्यत्तिकै चर्चित भएको थियो । थुप्रै कलेक्सन एल्वमहरुमा स्वर दिएकी आभाको आफ्नो एकल एल्वम भने ‘आभा’ र ‘सौभ्म’ हुन् ।
अहिले अर्को नयाँ एकल एल्वमको तयारीमा जुटेकी आभा यस एल्वमबाट गायिका मात्र नभई संगीतकारको रुपमा पनि आफुलाई चिनाउने भएकी छिन् । ‘हावासँगै मन उड्यो बहारसँगै मन फुल्यो, भेटछे कि त मनको क्षितिज आँखाभरी सपना डुल्यो’ आउने एल्वमको लागि शिमुरा वान्तवाको शब्दलाई गायिका आफैंले संगीतवद्ध गरेकी छिन् । त्यस्तै उनलाई मन परेको अर्को गीत हो, ‘पानी झैं सङलो आकाश झैं अग्लो, ऐना झैं सफा मन मेरी आमाको ।’ उनले नरदेवी राईको यो शब्दलाई पनि आफैंले संगीत भरेकी छिन् ।
बाल्यकालदेखि नै सांगीतिक वातावरणमा हुर्केकी आभाको चाहना भने नर्स बन्ने थियो । तर संगीतप्रेमी बाबा तिर्थराज राई र आमा नरदेवी राईको इच्छा र प्रेरणाले गायिका बनिन् । आमाबुबा गीत गाउनु हुन्थ्यो तर कलाकार बन्न नसकेपछि छोरीलाई गायिका बनाउने उनीहरुको इच्छा थियो । यसरी घरको संगीतमय माहोलमा हुर्केकी आभाले सानैदैखि विद्यालयमा हुने साँगीतिक कार्यक्रमहरुमा गीत गाउँदा सबैले उनको स्वरको तारिफ गरेपछि उनले पनि गायिका बन्ने सपना देख्न थालिन् ।
भोजपुरको दिल्पामा जन्मेकी आभाले गाउँबाटै एसएससी दिएर इटहरीमा कर्मश विषय लिएर अध्ययन गर्न थालिन् । त्यहाँं उनले संगीतकार भोला राईसँंग संगीतसम्वन्धी प्रशिक्षण पनि लिइन् । त्यसपछि राजधानी छिरेकी आभाले २०५४ सालमा रेडियो नेपालमा भएको आधुनिक गीत प्रतियोगितामा भाग लिइन् । उक्त प्रतियोगितामा उत्कृष्ठ १० मा परेपछि उनलाई रेडियो नेपालले मान्यताप्राप्त गायिकाको प्रमाणपत्र समेत दियो । उनले तत्काल रेडियो नेपालमा शुभ मुकारुङको शब्द र शान्तीराम राईको संगीतमा ‘यो साल फेरी बारीभरी अजम्बरी फूलेको छ’ बोलको गीत रेकर्ड गरिन् । यहि गीतबाट औपचारिक रुपमा संगीतमा लागेकी आभाले रेडियो नेपालमा लोक, आधुनिक, राष्ट्रिय र भजन जस्ता गीतहरु गाउन थालिन् ।
काठमाडौंमा गीत र अध्ययनलाई अगाडि बढाउदै उनले गुरुदेव कामतसँंग संगीत सिक्न थालिन् । त्यस्तै राष्ट्रिय नाचघरमा कमल क्षेत्री र ओमकार गड्तौलासँग पनि एक वर्षे संगीत प्रशिक्षण लिइन् । त्रिचन्द्र क्याम्पसबाट ग्रामीण विषयमा स्नातक आभाले इलाहाबाद केन्द्रबाट हुने परिक्षामा सहभागी भएर संगीतमा सिनियर डिप्लोमा गरेकी छिन् । गीत गाउनको लागि स्वर मात्र भएर हुन्न संगीत सम्वन्धि ज्ञान हुनु आवश्यक रहेको उनको भनाइ छ ।
लोक तथा आधुनिक गायिकाको रुपमा नेपाली साँगीतिक क्षेत्रमा स्थापित गायिका मुकारुङलाई लोकसंगीतले बढी मन छुने गर्छ । ‘नेपाली संगीतको मुल जरो नै लोकगीत हो’ उनी भन्छिन् । संगीत बिनाको जिन्दगी कल्पना गर्नै नसक्ने आभा शरीरले साथ दिइन्जेलसम्म गीत गाइराख्ने बताउँछिन् । त्यसैले त गीतसंगीतको माध्यमबाट समाजलाई केही दिन सकेमा आफनो जीवन सन्तुष्ट हुने उनको भनाइ छ ।
नेपालका विभिन्न ठाउँहरुमा पुगेर साँगीतिक प्रस्तुति पस्कदै आएकी आभा विदेशमा हुने साँगीतिक कार्यक्रमहरुमा पनि त्यतिकै व्यस्त हुन्छिन् । गीत गाउने क्रममा भारतको सिलगुडी, देहरादून सहित हङकङ, कतार, दुबई, दक्षिण कोरिया, यूकेलगायतका विभिन्न मुलुकमा पुगिसकेकी आभा प्रवासमा बस्ने नेपालीहरुको माया, सदभाव र सम्मानप्रति आभार प्रकट गर्छिन् ।
आउन लागेको नयाँ एल्वमको अहिले नै नाम जुराइसकेकी छैनन् तर चर्चित गीतकार र संगीतहरुको उत्कृष्ठ शब्द र संगीतको संयोजन रहने भएकोले पनि दर्शक तथा स्रोताले मन पराउनेमा आशावादी छिन् आभा ।
