कोरियाले २०१६ मा ५८ हजार प्रवासी कामदार भित्र्याउने
सोल-दक्षिण कोरिया सरकारले रोजगार अनुमति प्रणाली (ईपीएस) मार्फत अर्को बर्षका लागि ५८ हजार प्रवासी कामदार भित्रयाउने भएको छ । यहांको ज्याला निर्धारण समितिले गत शुक्रबार सन् २०१६ का लागि बढिमा ५८ हजार अदक्ष कामदारको कोटा प्रस्ताव गरेको हो । समितिको प्रस्तावलाई प्रधानमन्त्रीको कार्यलयले मंगलबार स्वीकृत गरेपछि सो प्रस्ताव पारित हुनेछ ।
५८ हजार कोटामध्ये २ हजार जगेडा राखिने र बांकि ५६ हजार चौमासिक रुपमा वितरण गरिने छ । कोरियाले साना तथा मझौला उद्योगहरुमा आवश्यक हुने अदक्ष कामदारको आपूर्ति हरेक बर्ष नेपालसहित १५ मुलुकबाट गर्दै आएको छ ।
प्रस्ताव गरिएको कोटामध्ये ४६ हजार पहिलोपल्ट ईपीएस परीक्षा उतीर्ण गर्नेका लागि र १२ हजार पुन:प्रवेश गर्नेका लागि छुट्टाएको छ ।
जसमध्ये उत्पादनमुलक क्षेत्रमा ३३ हजार २ सय, कृषि क्षेत्रमा ५ हजार ९ सय, निर्माण क्षेत्रमा २ हजार २ स ५० जना, मत्स्यपालनमा २ हजार ३ सय ६०, र सेवा क्षेत्रमा ९० जना कोटा तोकिएको छ । नेपाली कामदार भने उत्पादनमुलक र कृषि क्षेत्रमा मात्र आउने गरेका छन ।
मन्त्रालयले जनवरीदेखि मार्चसम्मका लागि उत्पादनमुलक क्षेत्रमा ९ हजार ९ सय ६०, कृषि तथा पशुपालन क्षेत्रमा ३ हजार ५ सय ४०, मत्स्यपालन क्षेत्रमा १ हजार ४ सय २०, निर्माण क्षेत्रमा १ हजार ४ सय ७० जना, र सेवा क्षेत्रमा ९० जना ल्याइने जनाइएको छ ।
जुलाईदेखि सेप्टेम्बरसम्मका लागि उत्पादन क्षेत्रमा ६ हजार ६ सय ४०, कृषि क्षेत्रमा २ हजार ३ सय ६०, मत्स्यपालनमा ९ सय ४०, निर्माण क्षेत्रमा ९ सय ८९ ल्याइने छ ।
त्यसैगरी, अक्टोवरदेखि डिसेम्बरसम्मका लागि उत्पादनमुलक क्षेत्रमा ६ हजार ६ सय ४० तोकिएको छ । रोजगारदाताबाट कामदारको माग बढि भएमा जगेडा कोटाबाट थप २ हजार ल्याइने जनाइएको छ ।
सन २०१६ मा ३७ हजार ५ सय ९३ जना कामदारको करार अवधि सकिने र उनिहरु स्वदेश फर्कनुपर्ने जनाइएको छ ।
पुनप्रवेश (सिविटी) का लागि छुट्टाएको १२ हजारमध्ये उत्पादनमुलक क्षेत्रमा ११ हजार, कृषिमा ७ सय, मत्स्यपालनमा २ सय ४० जना, निर्माणमा ५० जना र सेवा क्षेत्रमा १० जना ल्याइने छ ।
