हेटाैडा-काठमाडाैं सुरुङमार्गमा फस्याे कोरियाका नेपालीकाे पैसा

नविन अर्याल

सोल/कोरिया । दक्षिण कोरियामा कार्यरत लक्ष्मण गिरीले साढे दुई वर्षअघि हौसिँदै काठमाडौं-हेटौंडा सुरुङ मार्गमा शेयर लगानी गरे । नगरुन् पनि किन ? उद्योगी कुशकुमार जोशीको नेतृत्वमा रहेको कम्पनीले कोरियामै पुगेर सुनको अण्डा पार्ने आयोजनाबारे व्यापक विज्ञापन गरेको थियो ।

गुल्मी निवासी गिरीले सुरुङमार्गमा दुई लाख रुपैयाँ संस्थापक लगानी गरेका हुन् । उनीजस्तै कोरियामा कार्यरत नेपालीले एक लाख रुपैयाँदेखि ५ लाख रुपैयाँसम्म लगानी गरेका छन् । कुशकुमार जोशी आफैं कोरिया पुगेर लगानी गर्न हौस्याएपछि धेरैले शेयर खरिद गरेको गिरी बताउँछन् ।

तीन वर्षमा लगानीको ‘रिटर्न’ पाउन सुरु हुने बताइएको परियोजनाको निर्माण कार्य तीन वर्ष पुग्नै लाग्दा सुरुसमेत नहुँदा लगानीकर्तामा चिन्ता छाएको छ । सुरुङ निर्माता नेपाल पूर्वाधार विकास कम्पनीले कोरियासहित १० वटा मुलुकबाट संस्थापक लगानी भन्दै रकम संकलन गरेको थियो ।

नेपाल उद्योग वाणिज्य महासंघका पूर्वअध्यक्ष समेत रहेका चर्चित व्यवसायी जोशीले लगानीको राम्रो अवसर भनेपछि शेयर किनेको गिरी बताउँछन् ।

‘दुःख गरेर कमाएको पैसा लगानी गरियो, तर परियोजना अनिश्चित बनिदिँदा पीडाबोध भएको छ’ उनले भने ।
त्यसमाथि गैरआवासीय नेपाली संघ (एनआरएन)का उपाध्यक्ष भवन भट्टले कोरियामै सुरुङमार्गमा एक अर्ब रुपैयाँ लगानी गर्ने सम्झौता गरेपछि आफुहरु झनै हौसिएको गिरीको भनाइ छ ।

कोरियामा लिंक एशिया टुर्स एन्ड ट्राभल्सले सुनौलो सपना देखाउँदै सुरुङमार्गको लगानीका लागि विज्ञापन गरेको थियो । कम्पनीले हाइड्रो भन्दा राम्रो परियोजना भएको र एक लाख रुपैयाँ लगानी गरेमा तीन वर्षमै ४/५ लाख रुपैयाँ पुग्ने भनेपछि दुःख गरेर कमाएको पैसा शेयरमा लगानी गरेको लगानीकर्ताहरुको गुनासो छ ।

‘जोशीले नेतृत्व गरेको प्रोजेक्ट पक्कै पनि राम्रो होला भनेर ढुक्कसँग शेयर किनियो’ ती लगानीकर्ताले भने- ‘तर, प्रतिफल खाने आशा देखाइएको समय सकिन लाग्दासमेत निर्माण कार्य सुरु हुन सकेको छैन ।’

काठमाडौं-हेटौंडा सुरुङमार्ग ५८ किलोमिटर लामो परियोजना हो । चार लेनको बाटोसहित डिजाइन भएको सुरुङमार्गबाट हेटौंडा पुग्न एक घण्टामात्रै लाग्ने बताइएको छ । सन् २०१६ मा निर्माण सक्ने लक्ष्य लिँदा सुरुङमार्गमा ३५ अर्ब रुपैयाँ लाग्ने अनुमान गरिएको थियो । तर, यस अवधिसम्म निर्माण कार्यसमेत सुरु नहुँदा लगानी बढ्ने निश्चित छ ।

साढे दुई वर्षअघि कोरियामा पैसा संकलन गर्दा जोशीले सुरुङमार्ग धेरै राम्रो प्रतिफल दिने आयोजना भएको र तत्कालै निर्माण कार्य सुरु हुने दाबी गरेका थिए । लगानी डुब्दैन, राम्रो प्रतिफल दिन्छ भनेको कम्पनीले अहिले फोन गर्दासमेत राम्रो रेस्पोन्स नगर्ने लगानीकतार्को गुनासो छ ।

‘सुरुमा लिंक एशियाले फोन गरेर लगानी गर्न फकाइरहृयो, अहिले परियोजना के भइहेको छ भनेर बुझ्न फोन गर्दा पनि उठाउँदैन’ कोरियामा कार्यरत अर्का लगानीकर्ताले भने- ‘फोन उठाइहालेमा आफूलाई थाहा नभएको बताउँदै काठमाडौंमा रहेको अफिसमा फोन गर्न भन्छ भन्दै  अनलाईन खबरमा जनाईएको छ ।