पाँच अर्ब डलरमा बिक्यो याहु

इन्टरनेट उद्योगको बादशाह मानिने अमेरिकी कम्पनी याहुले आफ्नो ब्यबसायिक यात्राको दुःखद् अन्त्य गरेको छ । कुनै बेला माइक्रोसफ्टले ४४ अर्ब डलर दिदा पनि बेच्न अस्वीकार गरेको याहुले अहिले जम्मा ५ अर्ब डलरमा स्वामित्व गुमाउनुपरेको छ ।

निरन्तरको घाटापछि केही महिना पहिले आफुलाई बिक्रिमा राखेको याहुलाई अमेरिकी दुरसञ्चारकम्पनी भेरिजोनले ५ अर्ब डलरमा किनेको छ । पछिल्ला बर्षहरुमा इन्टरनेट कम्पनीहरु जुन दरमा खरिदबिक्रि भइरहेका थिए, त्यसको तुलनामा याहुको मूल्य निकै कम हो । सन् २००० मा याहुको सेयर मूल्य उच्च रहेका बेला उसको कुल बजार पूँजीकरण १ खर्व २५ अर्ब डलरको थियो ।

गत वर्ष भेरिजोनले किनेको अर्को इन्टरनेट कम्पनी एओएलसँग याहुलाई मिसाइने छ । यो खरिद सम्झौतामा याहुको चिनियाँ कम्पनी अलिबाबासँग भएको सेयरचाहिँ हिसाव गरिएको छैन ।

सन् १९९४ मा स्थापित याहुले सन् २००३ मा गुगललार्इ ३ अर्व डलरमा किन्ने प्रस्ताव गरेको थियो । तर, गुगलका संस्थापकहरूले त्यसलार्इ अस्वीकार गरे । याहुले त्यतिबेलै गुगलले आफुलार्इ धक्का दिने अनुमान गरिसकेको थियो ।
पछिल्ला बर्षहरूमा याहुले निरन्तर घाटा बेहोरिरहेको थियो । सन् २०१४ मात्र याहुले ४.४ अर्ब डलर घाटा बेहोरेको थियो ।डुव्नै लागेको याहु किनेको भेरिजोनले याहु किन्नुको कारण यसका एक अर्बभन्दा बढी प्रयोगकर्ता हुनुलाई मानेको छ ।