कोरियामा झुम्की प्रदर्शनको मिति अक्टोबर १६ लाई सर्यो
सोल, कोरियामा सेप्टेम्बर ४ तारिखको लागि प्रदर्शन मिति तय गरेको बहुप्रतिक्षित नेपाली चलचित्र झुम्कीको प्रदर्शन मिति सरेको छ । कोरियाबासी नेपालीहरुले अब झुम्की अक्टोबर १६ मा हेर्न पाउने भएका छन । चलचित्रको प्राबिधिक कार्य सम्पन्न भई नसकेकोले समयमै चलचित्र उपलब्ध गराउन नसक्ने जानकारी झुम्की युनिटले गराइएको हुँदा बाध्य भएर प्रदर्शन मिति सार्नु परेको तमु धीँका महासचिव श्रीराम गुरुङले जानकारी दिए ।
चलचित्र प्रदर्शन गर्ने स्थान र समय भने पुर्व निर्धारित अनुसारै हुनेछ ।
सेप्टेम्बर ४ लाई भनेर कोरियाका विभिन्न संघसंस्था तथा अतिथिहरुलाई निमन्त्रणा तथा टिकट बिक्रि बितरणको लागि पत्र पठाइसकिएको र अक्टोबर १६ को निम्ति तय भएको नयाँ मितिमा पनि यस अघि पठाइएकै निमन्त्रणा पत्र र बिक्री भैसकेको टिकटलाई आधार मानिने हुँदा सहयोग गरिदिनु हुन सबैमा धीँले अनुरोध गरेको छ ।
आपतकालीन राहतकोष वृद्धि र नेपाली कलासंस्कृतिको प्रवर्द्धन गर्ने उदेश्यले धीँले झुम्की कोरिया ल्याएको हो । नेपाली रजतपटका निकै ब्यस्त नायक तथा अभिनेता दयाहाङ राई , रिस्मा गुरुङ् र मनोज केसीको मुख्य अभिनय रहेको फिल्म झुम्कीलाई अपिल विष्टले निर्देशन गरेका छन ।
