बाग्लुङ् सम्पर्क समिति गणतन्त्र कोरियाको गतिविधि
एक थुकी सुकी सय थुकी नदी भन्ने नेपाली उखानलाई चरितार्थ गर्दै प्रवासमा रहेर पनि आफ्नो देश र समाजको लागि केही गर्ने सपना लिएर स्थापना भएका सामाजिक संघसंस्थाहरु कोरियामा प्रसस्तै छन् । जसमध्ये सामाजिक कार्यमा सक्रिय बाग्लुङ् सम्पर्क समिति पनि एक हो । आपत विपतमा परेका बालुङ्बासी तथा नेपालीहरुलाई सहयोग गर्ने उदेश्यले सन् २००१ मा स्थापित बाग्लुङ् सम्पर्क समिति गणतन्त्र कोरियाले हालसम्म थुपैं सामाजिक कार्यहरु गरिसकेको छ । कोरियामा कार्यरत लक्ष्मण पुन र श्याम छन्त्यालको पहलमा इन्छनमा ४० जना बाग्लुङ्बासीहरुको भेलाबाट स्थापित संस्थाले प्रवासी भूमिमा प्रवाशी नेपाली बिच सुमधुर सम्बन्ध स्थापना गर्दै बिभिन्न किसिमका कार्यक्रमहरुको आयोजना गर्दै आएको छ ।
त्यसैगरी खेलकुदको विकासका लागि विभिन्न कार्यक्रमको आयोजना गर्दै आएको समितिले नेपाली संस्कृतिको प्रचार प्रशार गरि कोरियन पर्यटकहरुलाई नेपालमा आकर्षण गराउन पहल गर्ने र गृह जिल्ला बाग्लुङ्ग तथा नेपालकै बिभिन्न क्षेत्रमा दैबि प्रकोप,बाढी पहिरो तथा शिक्षा,स्थास्थ्य र पर्यटन जस्ता क्षेत्रहरुमा सक्दो सहयोग प्रदान गर्दै आएको छ । त्यस्तै दक्षिण कोरियामा बिभिन्न पेशा र ब्यवसाय र रोजगारमा आएका नेपालीहरुमा पर्ने दुखद दुर्घटना, मृत्यु, बिरामी तथा नेपालमा हुने दुखद दुर्घटना बाढी पहिरो तथा ठुला बिरामीहरुलाई समेत सहयोग गर्दै आएको छ । साथै यहाँ दक्षिण कोरियामा हुने सुखद कार्यहरुमा पनि सहयोग सहभागि र सहकार्य गर्दै आएको छ । सहयोग गर्ने क्रममा केहि बर्ष पहिले बाग्लुङ्ग निवासी होम छन्त्यालको हात मेसिनमा परि एउटा हात गुमाएका थिए । उनको उपचारको लागि समितिको सक्रियतामा करिब ४० लाख कोरियन वन संकलन गरि सहयोग प्रदान गरेको भने सन २००८ मा बाग्लुङ्गको पाण्डबखानी रमुवामा गएको पहिरो पिडित लाई रु ५० हजार सहयोग संकलन गरि पठाएको थियो ।
बाग्लुङ्ग सम्पर्क समिति स्थापनाकालदेखि नै विभिन्न सामाजिक कार्यमा सक्रिय रहेकोले आपत बिपतमा परेका नेपालीहरुलाई संस्थाले सकेको साना ठुला सहयोग नियमित रुपमा गर्दै आएको छ । संस्थालाई आर्थिक रुपमा बलियो बनाउनको लागि केहि आर्थिक नीतिहरु लिई कार्यान्वयन गरियो । जस्तै, कोरियामा कार्यरत बाग्लुङ्गबासीहरुबाट मासिक लेबिको सट्टा एकमुष्ठ १लाख कोरियन वन (नेपाल जाने बेलामा फिर्ता हुने)संकलन गरि आन्तरिक रुपमा परिचालन गरिएको छ । जसमा १३० जना भन्दा बढि सदस्यहरु सहभागि छन् । यसबाट प्राप्त ब्याजले संस्था संचालन गर्न आर्थिकरुपमा धेरै सहज भएको छ । त्यस्तै अन्य आयमुलक कार्यमा भलिबल प्रतियोगिताको आयोजना ५ पटक गरियो । सन २००८ फेब्रुरीको सलनालमा धौलागिरी सांगितिक सौगात भाग १ सफलता पूर्बक सम्पन्न गरि ३० लाख वन बचत गरेको थियो । सोही रकममा बाग्लुङ्गवासी लगायत अन्य नेपालीहरुबाट समेत रकम संकलन गरि २०१२ को जनवरिमा धौलागिरी अञ्चल अस्पताल बाग्लुङ्गमा रु ५ लाख ५० हजार को विशेष स्वास्थ्य सेवा अक्षयकोष स्थापना गरिएको छ । बाग्लुङ्ग बुर्तिबाङका बिरामी हिरामति घर्ति मगरलाई जाल पुन र बाग्लुङ्ग सम्पर्क समितिको पहलमा रु १ लाख संकलन गरि सहयोग प्रदान गरिएको छ भने २ जनालाई जहाज टिकट काटेर नेपाल पठाइएको छ ।
त्यस्तै सन् २०११ को अक्टुबरमा बाग्लुङ्गको रेशमा गएको पहिरोबाट ५जनाको मृत्यु भएको र दर्जनौ महिला गम्भिर घाईते भएकाले घटना भएको ४ दिनमै पहिरो पिडितलाई रु १ लाख ६७ हजार सहयोग प्रदान गरेको थियो । २०१२ अप्रिलमा बाग्लुङ्ग शिशाखानीका मृगौलाका बिरामी रेवति पौडेल लाई रु २८००० संकलन गरि पठाउनुका साथै बाग्लुङ्ग जैदिका मृगौलाका बिरामी हेम राना लाई रु ५०,००० संकलन गरि सहयोग गरिएको छ । २०१२मा कास्कीको सेती नदिमा आएको भिषण बाढीबाट करोडौंको जन धनको क्षति भएकोले कास्की परिवार कोरियाले राहत स्वरुप सहयोग संकलन अभियान चालेकोले बाग्लुङ्ग सम्पर्क समितिद्वारा पनि ३ लाख ६० हजार वन प्रदान गरिएको छ । सन २०११ को फेब्रुरी २ सलनालमा तत्कालीन बिश्वको सबै भन्दा होचो ब्यक्ति श्री खगेन्द्र थापा मगरलाई रात्रीभोजको साथमा सम्मान सहित ५ लाख वन र जिन्सी उपहार प्रदान गरिएको थियो । २०१२ को सेप्टेम्बर ३० मा धौलागिरी सांगितिक सौगात भाग २ कार्यक्रम भब्यरुपमा सम्पन्न गरेको छ र यस कार्यक्रमबाट १ करोड ८० लाख कोरियन वन झण्डै १४ लाख रुपयाँ बचत भएको छ । यस कार्यक्रमको उद्देश्य अनुसार नै बाग्लुङ्ग जिल्लाको दुर्गम क्षेत्रमा शैक्षिक बिकाश गर्न विद्यालयको भवन निर्माण गर्नको लागि रु ५ लाख रुपयाँ बिनियोजन गरिएको छ भने कोरियाको लागि आपतकालिन राहतकोष निर्माण गर्नको लागि ५० लाख कोरियन वन (करिब ४ लाख रुपयाँ) बिनियोजन गरिएको छ ।
त्यसैगरी बाग्लुङ्गको बोगादोभानमा रहेको जनजागृति उच्च माविमा कोरियाबाट १५ लाख रुपैया र बाकी रकम विद्यालयले व्यहोर्ने गरी १८ लाख रुपैयाको लागतमा ३ कोठे पक्की भवन निमार्ण हालै सम्पन्न भइसकेको छ । त्यस्तै गतवर्ष गलकोट समाज जापान र बाग्लुङ्ग सम्पर्क समिति दक्षिण कोरियाले गलकोट प्राथमिक स्वास्थ्य केन्द्र हरिचौरलाई करिव २० लाख रुपैयाँ सहयोग गरि एम्बुलेन्स संचालन गरिरहेको छ । जसलाई दिगो रुपमा संचालन गर्नको लागि १० लाख रुपैयाँको अक्षय कोषको समेत स्थापना गरिएको छ ।
यसरी बाग्लुङ्ग सम्पर्क समिति दक्षिण कोरियाले कोरियामा रहेर आपतविपतमा परेका प्रवासी नेपालीमात्र नभइ नेपालको ग्रामिण भेगमा रहेका स्वास्थ्य, शिक्षा र दैविप्रकोप जस्ता आपतविपतमा साथ र सहयोग दिदै आएको छ । आगामि दिनहरुमा पनि विभिन्न सामाजिक क्रियाकलापलाई निरन्तरता दिनुका साथै प्रभावकारी कार्यमा सदैव अगाडि बढिरहने छ ।
(लेखक बाग्लुङ् सम्पर्क समिति दक्षिण कोरियाका अध्यक्ष हुन् ।)
