हुन्डाई कम्पनीका मजदुरले गरेको बन्दको प्रत्यक्ष असर नेपाली कामदारमा
सोल, विश्वको पाँचौ ठुलो कार निर्माता हुन्डाई कम्पनीका मजदुरहरुले गरेको बन्दको प्रत्यक्ष असर नेपाली कामदारहरुमा पनि परेको छ । तलव वृद्धिको माग राखि आन्दोलनमा रहेका मजदुरले काम रोकेपछि कार उत्पादनमा सुस्तता आएको छ ।
हुन्डाईद्वारा उत्पादित कारहरुका लागि पार्ट्सहरुको आपूर्ति गर्दै आएका साना तथा मझौला कम्पनीहरुमा कार्यरत नेपाली कामदारहरुको ज्यालामा उल्लेख्य कमि आएको छ । हुन्डाईमा सेप्टेम्बर २६ देखि सुरु गरिएको आन्दोलनका कारण साना तथा मझौला कम्पनीहरुमा माग घटेपश्चात कामदारहरुको दैनिक कार्यअवधि पनि घटेको छ । मजदुरहरुले व्यवस्थापनसामु तलब वृद्धिको माग राखि काम रोकेका छन । मजदुरहरुले पहिलो दिन १२ घण्टा काम रोकेका थिए भने त्यसपछिका दिनहरुमा आंशिक काम गर्दै आएका छन । मजदुरहरुले दैनिक छ घण्टा मात्रै काम गर्दा हुन्डाईका उत्पादन घटेको छ ।
यस बर्ष हुन्डाई कम्पनीमा तलब वृद्धिको माग राखि २१ पटक बन्द गरिएको थियो भने २७ पटक मजदुर र व्यवस्थापन बीच सम्झौता गरिएको थियो । हुन्डाईमा मजदुर आन्दोलनका कारण पुरा दिन काम रोकिएको बिगत १२ बर्षमा पहिलो पटक हो । मजदुरहरुले सेप्टेम्बर २६ मा पुरा दिन टुल्स डाउन गरेका थिए । मजदुर आन्दोलनका कारण यसबर्ष एक लाख २६ हजार कारहरुको उत्पादनमा कमि आई २.५ बिलियन डलर कम्पनीलाई घाटा पुगेको संचार माध्यमहरुले उल्लेख गरेका छन ।
हुन्डाई कम्पनीमा आश्रित साना कम्पनीहरु पनि मजदुर आन्दोलनको मारमा परेका छन । हुन्डाई मार्फत मागमा कमि आएका कारण साना कम्पनीहरुले कामदारहरुको दैनिक कार्यअवधिमा कटौति गरेका छन । नो वर्क नो पे प्राबधानका कारण कामदारहरुको मासिक तलव स्वत घट्ने भएको छ । कार निर्यातमा अग्रणी हुन्डाई कम्पनीमा भएको आन्दोलन तुरुन्त रोक्न श्रममन्त्री लि कि क्वानले मजदुरपक्षलाई दबाब दिएका छन भने मजदुर युनियन हुन्डाई शाखाका अध्यक्ष पार्क यू किले जुनसुकै मुल्य चुकाएर पनि तलबवृद्धिको माग पुरा गराउने बताएका छन ।
हुन्डाई कार उत्पादन हुने मुख्य केन्द्र उल्सान सहित आसान र छन्जुमा करिब ५० हजार मजदुरहरु तलबवृद्धिको माग राखि आन्दोलनमा छन । उल्सानस्थित सानअब कम्पनीमा कार्यरत गुल्मीका सन्तोष पौड्यालले भने हुन्डाई मार्फत मागमा कमी आएकोले बिगत एकसाता देखि कार्य अवरुद्ध छ । पौड्यालका अनुसार उनि कार्यरत कम्पनीले हुन्डाईका लागि पोर्टर भ्यानको बडी, कारको चेसिस ,ढोकामा लाग्ने पार्ट्सहरु उपलब्ध गराउदै आएको थियो । हुन्डाई एभान्टि कारका पार्ट्सहरु आपूर्ति गर्दै आएको देशिन कम्पनीमा कार्यरत संखुवासभाका अशोक कोइरालाले गत साता मात्र दिन काम गरेको बताए ।
