“मुक्तक मञ्जरी”आउदै
सोल, नेपाल मुक्तक प्रतिष्ठान दक्षिण कोरिया शाखाले मुक्तकहरुको संग्रह “मुक्तक मञ्जरी” पाठकहरु सामु ल्याउन लागेको छ । आगामी आइतबार एक कार्यक्रमका बीच पुस्तकको बिमोचन गरिने शाखाले जनाएको छ । पुस्तकको रुपमा बजार ल्याउन लागिएको मुक्तक संग्रहमा चार दर्जन मुक्तक अनुरागीहरुको रचना समाबेश गरिएको छ ।
कोरिया शाखाले आगामी आइतबार दुर्गा रेष्टुरेन्ट, थेगुमा (यङ्नाम युनिभर्सिटी नजिकै) बिमोचन कार्यक्रम राखेको छ एक सय पाँच पृष्ठको मुक्तक संग्रह कोरिया शाखा मार्फत बजारमा ल्याउन लागिएको पहिलो मुक्तक संग्रह हो । औपचारिक कार्यक्रमको समापनपछि रचना वाचनको कार्यक्रम पनि रहेको हुनाले आफ्ना सृजनाहरु लिएर उपस्थित हुनका लागि शाखाले अनुरोध गरेको छ ।
बेलायत ,इजरायल मलेसियामा समेत शाखा रहेको नेपाल मुक्तक प्रतिष्ठानको कोरिया शाखा २०७० असार १५ मा गठन गरिएको थियो । पुस्तक बिमोचन पश्चात नयाँ कार्यसमिति पनि चयन गरिने जानकारी दिदै शाखाका सचिव खगेन्द्र पराजुलीले संघ संस्थाका प्रतिनिधिहरु, पत्रकारहरु तथा साहित्यलाई माया गर्ने सम्पूर्णलाई उपस्थितिको लागि आग्रह गरे । नेपाल मुक्तक प्रतिष्ठानको चतुष्पदीय शैलीको मुक्तकको विकास र प्रबर्द्धन गर्ने उद्देश्य रहेको छ ।
