कोरिया पुनह प्रवेश गर्न पाउने सिविटी परिक्षा २०१७ को लागि स्थगित
सउल,
सिबिटी पास गरि फर्कने युवाहरुको संख्या बढेपछि दक्षिण कोरियाले २०१७ का लागि सिबिटी परिक्षा स्थगित गर्ने भएको छ । पुनः प्रवेशका लागि सिबिटी पास गरि प्रतिक्षा सुचीमा धेरै कामदारहरु रहेकोले यस बर्षका लागि सिबिटी रोक्ने निर्णय गरिएको हो ।
सिबिटी पास गरेर लामो समय रोस्टरमा रहेका युवाहरु कोरिया प्रवेश गर्न असमर्थ रहेकोले श्रम मन्त्रालयले इपिएस लागु गरिएका १६ देशमा सिबिटी परिक्षा रोक्ने निर्णय गरेको हो । सिबिटी पास गरेको दुइ बर्ष भित्रमा कम्पनीबाट माग नभएको अवस्थामा रोस्टरबाट स्वत नाम हटाउने गरिएको छ । दुइ पटक स्वास्थ्य परिक्षण गरि कामदारहरु प्रतिक्षारत छन ।
तिन बर्ष कोरिया बसेर फर्केकाहरुको लागि २०१३ देखि सिबिटी परिक्षा प्रणाली शुरु गरिएको थियो । हालसम्म १५ चरणमा सिबिटी परिक्षा भएको छ । इपिएस कार्यलयका दिएको जानकारी अनुसार एक हजार दुइ सय भन्दा बढी कामदारहरु वेटिंग लिस्टमा छन । १६ देशमा संचालित सिबिटी परिक्षाबाट पास भएर प्रतिक्षा सुचीमा रहेकाहरुलाई २०१७ मा कोरिया फर्कन अवसर दिने मन्त्रालयको तयारी छ ।
सिबिटी परिक्षा २०१७ को लागि स्थगित गर्ने निर्णयमा मन्त्रालय पुगेपनि मातहतका बिभाग तथा विदेश स्थित इपिएस कार्यलयलाई जानकारी केहि दिन पछि गराउने जनाइएको छ । प्रवाशी मजदुर युनियनका अध्यक्ष उदय राईले मन्त्रालय तहमा निर्णय भइ परिपत्रको प्रक्रियामा रहेको जानकारी प्राप्त भएको बताए । राइका अनुसार औपचारिक जानकारी एच आर डी कार्यालयलाई पनि हालसम्म पठाइएको छैन ।
इपिएस कार्यालयले सिबिटी रोकिएको आधिकारिक पत्र प्राप्त नभएको जानकारी गराएको छ । इपिएस कार्यालय निर्देशक बाबुराम खतिवडाले सिबिटी परिक्षा २०१७ का लागि स्थगित बारे औपचारिक तथा अनौपचारिक जानकारी नआएको बताए । उनले भने १५ औ चरणको सिबिटी परीक्षा पश्चात १६ औ चरणको परिक्षा संचालन गर्ने नगर्ने बिषयमा जानकारी दिईएको छैन ।
सिबिटी स्थगितको कारणले अवैधानिक नेपाली बढ्नसक्ने प्रति खतिवडाले चिन्ता व्यक्त गरे । बैदेशिक कामदार नीति निर्धारण समितिले नेपालीहरु सबैभन्दा कम गैरकानुनी रुपमा बसेको गत महिना तथ्यांक निकालेको थियो । अवैधानिक नेपाली कामदारहरु सात सय ७३ जना रहेको उल्लेख गरिएको छ ।
