अष्ट्रेलियाका धनाढ्यको सूचीमा घले दम्पति १०० औं नम्बर भित्र
फोनिज कोरिया संवाददाता
अष्ट्रेलिया – अस्ट्रेलियाका धनाढ्यहरुको सूचि प्रकाशन गर्ने बिजनेस रिभ्यु विक्लीले सार्वजनिक गरेको सन् २०१५ का सबैभन्दा धनी २ सय व्यक्तिको सूचीमा गैरआवासीय नेपाली संघका अध्यक्ष शेष घले र उनकी पत्नी जमुना गुरुङ अस्ट्रेलियाका सबैभन्दा धनी १ सय व्यक्तिभित्र पर्न सफल भएका छन् । गत वर्ष १५० औं स्थानमा रहेका शेष घले यो वर्ष ठूलो फड्को मार्दै ९९ औँ नम्बरमा उक्लिन सफल भएका हुन् । अघिल्लो बर्ष १५१ औं नम्बरमा रहेकी उनकी पत्नी जमुना यो बर्ष १०० स्थानमा उक्लेकी छिन् |
घले दम्पतीको पछिल्लो एक वर्षमा कुल सम्पत्तिमा झण्डै १५ करोड डलर वृद्धि भएको देखिएको छ । गत वर्ष उनीहरुको कुल सम्पत्ति ३३ करोड ५० लाख डलर थियो । घलेकी पत्नी जमुना अष्ट्रेलियाली धनाढ्य महिलाहरुको सूचीमा आठौं धनी महिला हुन् ।
सन् १९९० को दशकको सुरुतिर अध्ययनका लागि अस्ट्रेलिया पुगेका घले दम्पतिको शिक्षा तथा रियल स्टेट लगायतका उद्योगमा लगानी रहेको छ । यसैगरी घलेले काठमाण्डौमा ८ अर्ब रुपैयाँ लगानीमा शेराटन ब्राण्डमा पाँचतारे डिलक्स होटल संचालनको निम्ति अहिले धमाधम निर्माण कार्य भइरहेको छ ।
पछिल्ला बर्षहरुमा नेपाल र नेपाली समुदायको सेवामा सक्रिय रहेका घलेले नेपालको शिक्षा र स्वास्थ्य क्षेत्रमा लगानी गर्नेगरी एक अर्ब रुपैयाँको परोपकारी कोष स्थापना गरेका छन् । यो नै नेपालमा अहिलेसम्मको सवैभन्दा ठूलो निजी क्षेत्रको परोपकारी कोष हो । करिव ७० मुलुकमा संजाल भएको गैरआवासीय नेपाली संघको नेतृत्व गरिरहेका घलेले भूकम्पको महावितका बेला गाउँगाउँ पुगेर राहत वितरण गरी एनआरएनलाई परिचालन गरेका थिए |
घले दम्पतिले भुकम्प पिडितलाई व्यक्तिगत रुपमा एक- एक करोड पनि सहयोग गरेका थिए |
