कोरियामा बृहत् मुक्तक मेला हूने
सौल
-अन्तर्राष्ट्रिय नेपाली साहित्य समाज कोरिया च्याप्टरले आगामी जुलाई ९ तारीख आइतबारका दिन बृहत् मुक्तक मेलाको आयोजना गर्ने भएको छ । नेपाली साहित्यका विविध विधाहरूमा केन्द्रित रही कार्यक्रम गरिरहेको कोरिया च्याप्टरले काव्य-सुधाको तेस्रो श्रृङ्खलाको रूपमा मुक्तक मेलाको आयोजना गर्न लागेको च्याप्टरका अध्यक्ष कृष गुल्मेली बाबूले जानकारी दिनुभयो ।
राजधानी सौल स्थित शुभेच्छा होटलको सभाहलमा आयोजना गरिने मुक्तक मेलामा कोरियामा कार्यरत रही मुक्तकमा कलम चलाइरहेका करिब एक दर्जन मुक्तककारहरूको प्रस्तुति रहने छ भने सयौं कोरियाबासी नेपाली सर्जकहरुले आफ्ना मुक्तकहरु वाचन गर्नुहुनेछ ।
मुक्तक मेलाको मुख्य आकर्षणका रूपमा मुक्तककारहरू बलदेव भट्टराई, प्रमोद सारंग, नारायण भुसाल, गङ्गा बस्नेत, दीपेन्द्र भट्टराई, समीर यात्री, महेन्द्र केसी,पूर्वेली गाउँले र रेशम अधिकारीका बेजोड मुक्तकहरूको प्रस्तुति रहने कार्यक्रम संयोजक डि आर न्यौपाने “सूर्य”ले जानकारी दिनुभयो । दर्शकहरूले एकै मन्चबाट उत्कृष्ट मुक्तककारद्वारा लेखिएका सामाजिक, राजनीतिक, प्रणयधारका उत्कृष्ट मुक्तकहरूको मजा लिन पाउने आयोजकको भनाई छ । च्याप्टरले यसअघि उत्कृष्ट कवि तथा चर्चित गजलकारहरूको साथमा कविता वाचन तथा गजल मुशायरा सन्चालन गरिसकेको छ भने हालै मात्र अनेसासको प्रथम एसियाली नेपाली साहित्य सम्मेलन तथा विश्वकाव्य गोष्ठी सम्पन्न गरेको छ ।
