माछापुच्छ्रे कप सम्पन्न , वर्षाले प्रभावित खेलमा ४ टिमलाई सामुहिक विजेता घोषणा
कास्की परिवार दक्षिण कोरियाको आयोजनामा भएको प्रथम माछापुच्छ्रे कप फुटबल प्रतियोगितामा ४ टिमलाई सामुहिक विजेता घोषणा गरिएको छ ।
गत आइतबार आयोजित प्रतियोगिताको क्वाटरफाइनलका खेलहरु सम्पन्न पश्चात भारी वर्षा भएको थियो । निरन्तर भारी वर्षापछि खेललाई पुनः सुचारु गर्न असम्भव भएपछी खेल रेफ्री, कोरियामा फुटबल गतिविधिहरुको सर्वोच्च संस्था नेपाल फुटबल महासंघ कोरिया , आयोजक र सेमिफाइनल पुग्न सफल टिमको व्यवस्थापकहरुको सामुहिक निर्णयले चारै टिमलाई विजेता घोषणा गरि कुल पुरस्कार राशी बाँडफाँड गर्ने निर्णय गरिएको थियो । विजेता र उपविजेतालाई क्रमशः २२ लाख वन र १२ लाख वन पुरस्कार रहेको थियो ।
लमजुङ एफसी, धरान एफसी, झापा एफसी र मसाक एफसीले प्रतीटिम ८ लाख ५० हजार वनको दरले पुरस्कार र प्रमाणपत्र प्राप्त गरे । विजेता घोषणा हुन नसक्नेपछी प्रतियोगिताको विजेता ट्रफी भने सबैको सल्लाहले नेपाल फुटबल महासंघ दक्षिण कोरियालाई हस्तान्तरण गरिएको खेलकुद संयोजक क्षेत्र गुरुङले जानकारी दिए । सोही दिन ३५ वर्षमाथिको भेट्रान टिमहरु भेटघाट एफसी र मिलिजुली एफसीविच मैत्रीपुर्ण खेल भएको थियो । परिवारको अध्यक्ष दिल बहादुर जलारी ( पासा) को अध्यक्षता र नेपाल फुटबल महासंघ दक्षिण कोरियाको अध्यक्ष कृष्ण गुरुङ ( ब्रो )को प्रमुख आतिथ्यतामा भएको औपचारिक कार्यक्रमलाई परिवारको सचिव अमृतप्रसाद बास्तोलाले सञ्चालन गरेका थिए ।
प्रतियोगितामा नेपाली खाना स्वादिष्ट परिकारहरुको पनि उपलब्धता रहेको थियो । प्रतियोगिता सोयोसन फुटबल मैदानमा गत आइतबार भएको थियो । सोही अवसरमा कास्की परिवारले विश्व भ्रमणमा रहेका नेपालका तीन जना साईकलयात्रीहरुलाई सम्मान तथा नगद सहयोग प्रदान गरेको छ । विश्व शान्ति तथा वातावरण संरक्षणको जनचेतना फैलाउने उद्देश्यले विश्व साइकल यात्रामा निस्किएका साईकलयात्रीत्रय निर्मल बराल (कास्की),अनिश ढकाल (तनहुँ ) तथा दिलिप क्षेत्री (काभ्रेपलान्चोक ) यतिबेला दक्षिण कोरिया आईपुगेका हुन । उहाँको भ्रमणलाई केही सहयोग मिलोस भनेर परिवारले ३ लाख कोरियन वन सहयोग गरेको अध्यक्ष जलारीले बताए ।
