फेरी एक नेपालीले गरे आत्महत्या
रोजगार अनुमति प्रणाली ईपीएस मार्फत कोरिया आएको ४ महिना पनि नपुग्दै अर्का एक नेपाली युवाले आत्महत्या गरेका छन् । नेपालको स्थाई घर गुल्मी भई हाल बुटवलको नयांगाउं बस्दै आएका कमल कार्कीले सोमबार विहान आत्माहत्या गरेका हुन् ।
ख्यङगिदोको हवासङ स्थित छोआमको एक मोर्टरपार्टस बनाउने कम्पनीमा कार्यरत कार्की कम्पनीको छेउमा रहेको गोदामको फलामे बिममा झुण्डी रहेको अवस्थामा फेला पारेपछि प्रहरीलाई खबर गरिएको थियो ।
सुरुमा आन्सनको एक कम्पनीमा काम गरेका कार्की त्यो कम्पनीमा काम गर्न गाह्रो भएपछि झण्डै एक महिना अघि अर्को कम्पनीमा काम गर्न थालेका थिए । उक्त कम्पनीमा
कम्पनीमा ११ जना नेपालीहरु कार्यरत थिए । विदेशी कामदारहरु कम्पनी देखि अन्दाजी १५० मिटरको दुरीमा रहेको कन्टेनरमा बनाएको होस्टेल ( खिसुक्सा) मा बस्ने गर्दथे । कोठामा मृतक कार्कीसंग संगै सुत्ने अर्को नेपालीले भने, ‘हिजो बेलुकी संगै खाना खाएर कोठामा आएको थियौ । रातको २ बजे तीर कोठाबाट निस्केको थाहा पाएको थिए । शौचालय गएको होला भनेर त्यति वास्ता गरिन तर विहान सुति रहेको अवस्थामा कोरियनले आएर कार्कीले आत्माहत्या गरयो भनेको सुन्दा चकित र स्तव्ध भए।’
काम सकिने वितिकै मोबाईल फोनमा व्यस्त रहने मृतक कार्कीको आत्माहत्या कम्पनीमा कामको प्रेसरले नभई पारिवारीक विषयका कारण हुन सक्ने अनुमान संगै काम गर्ने नेपालीहरु बताउछन ।
नेपाली युवाहरुको लागी वैदशीक रोजगारमा दक्षिण कोरिया अति लोकप्रिय भएसंगै आत्माहत्या गर्नेहरुको संख्यामा पनि अत्याधिक बृद्धि भई रहेको छ । यस विषयमा सम्बन्धीत निकायको ध्यानाकर्षण हुनु आवश्यक देखिन्छ ।
