एनआरएनए र मेरो उमेदवारी

नेपालीको लागि नेपाली भन्ने मुल मन्त्रका साथ अगाडि बढिरहेको एनआरएनए आन्दोलनलाई स्थापना कालदेखि नै नजिकबाट नियाली रहँदा र दक्षिण कोरियामा एनआरएनएको स्थापना गरि संस्थापक अध्यक्ष हुँदै दुईपटक अध्यक्ष र आईसिसि हुँदा गैर आवासिय नेपाली संघ मार्फत अझै केहि सामाजिक कार्यहरु गरि अगाडि बढ्न अभिप्रेरित भएको छु ।

विश्वभरि छरिएर रहनु भएका नेपाली दाजुभाई, दिदिबहिनिहरु र नेपाल बाहिर रहेर नेपालमा केहि गर्न चाहने व्यक्तिहरुको भावनालाई समेटेर हामी अगाडि बढ्दै गर्दा मैले कर्मभूमि बनाएर बसेको कोरियाले हाम्रै आँखा अगाडि गरेको प्रगतिले मलाई झकझकाई रहेको छ ।

हाल कोरियामा रहेका करिव ४०,००० नेपाली मध्ये बहुसंख्यक शिक्षित तथा अनुभवि जनशक्ति रहेको छ । यहाँ सिकेको सिप र कमाएको पुँजि उत्पादनमुलक क्षेत्रमा राज्यले लगाउन सकेमा देश विकाशमा ठुलो टेवा पुग्नेछ । प्रविधिमा पोख्त जनशक्ति र मित्र राष्ट्रहरुसँग प्रविधि हस्तान्तरणको अनुरोध गरि देश विकाश गर्न सकिन्छ । यसैगरि विद्यार्थिहरुको वाहुल्यता रहेको जापानबाट शिप र ज्ञान भित्राउन सकिन्छ । हङ्गकङ्ग मकाउ लगायतमा रहेका नेपालीहरु उचित र सुरक्षित लगानिको पर्खाईमा रहेको बुझिएको छ । मलेसियामा काम गरिरहेका उर्जाशिल जनशक्ति लगायत मैले उमेदवारी घोषणा गरेको एसिया पेसिफिक क्षेत्रका सम्भावनाहरु हुन ।

श्रम समस्या र पारिवारबाट टाढाहुँदाका समयमा हुने डिप्रेसन र सो बाट निम्तिने दुर्घटना, अन्य मुलुकको भाषा र समायोजनको समस्या ठुलो समस्या हुँदाहुदै पनि नेपाल र नेपालीको सहयोगि भावनाले आपसि भाईचाराको विकाश भईरहेको अवस्था छ र अझै यसलाई बढाएर समयमै सम्बोधन गर्नुपर्दछ, जसबाट दुर्घटना न्यूनिकरणमा सहयोग पुग्दछ । यो क्षेत्रमा मेरो सहयोग पहिले पनि छ र अझ शसक्त ढंगले हुने नै छ ।

प्रवासमा बसिरहनु भएका साथिहरुको समस्याका वारेमा विगत २५ बर्षदेखिको म समेत एक भूक्तभोगि भएको नाताले आफुले गनुपर्ने सहयोगको लागि कुनै कसर बाँकी राख्नेछैन साथै नेपाल सरकार र सम्बन्धित निकायको समेत एनआरएनए मार्फत ढोका ढक्ढकाई उचित सुझाव दिई समस्याहरुको तत्कालिक समाधानमा लाग्ने नै छु ।

एनआरएनमा सबै प्रवासि नेपालीहरुको भावनालाई र प्रतिनिधित्वलाई सुनिश्चित गर्दै विधानको संसोधन र व्याख्याका साथै जन्मभूमिमा केहि समस्या पर्दाखेरि एकढिक्का भई उभिने र प्रवाशमा साथिहरुलाई समस्याहरु पर्दा सहयोग र समन्वयकारी भूमिकामा प्रस्तुत हुनेगरि आवाज बुलन्द गर्ने र विदेशमा सिकेका ज्ञान, सिप, प्रविधि र पूँजिको प्रयोग गर्दै देश विकाशमा हातेमालो गर्ने प्रण गर्दै एनआरएनएको एसिया पेसिफिक क्षेत्रको उप संयोजक पदको लागि आफ्नो उमेदवारी घोषण गर्दछु ।
धन्यवाद ।
विनोद कुँवर (एसिया पेसिफिक क्षेत्रको उप संयोजकका उमेदवार)