सोनसिकको छैटौं शैक्षिक सेमिनार आयोजना गर्ने

रमेश परियार
नेपाली बिद्यार्थी समाज दक्षिण कोरिया-सोनसिक (SONSIK) ले फेब्रुअरी १०-११, २०१८ मा दक्षिण कोरिया, इक्सन स्थित वोनखोङ्ग विश्वविद्यालयमा सोनसिकको छैटौं शैक्षिक सेमिनार आयोजना गर्ने भएको छ ।

“कोरियाको शिक्षा र अनुसन्धानको नेपालमा कार्यान्वयन तथा कोरियामा नेपालीका लागि अवसर” भन्ने विषयमा २ दिन सम्म कार्यक्रम हुने र हाल कोरियामा रहनु भएका अनुसन्धानकर्ता, प्राध्यापक र विशिष्ट व्यक्तित्वहरुले आफ्नो बिचराहरु राख्नु हुनेछ। कार्यक्रमको लागि सबै वक्ताहरुलाई निमन्त्रणा गरिसकिएको कुरा कार्यक्रमका संयोजक अंजना सिलवालले जानकारी गराउनु भयो।

कार्यक्रमको प्रमुख आतिथिको लागि कोरियाका लागि नेपालका राजदुत महामहिम अर्जुन जंग बहादुर सिंहलाई निमन्त्रित गरिएको र कार्यक्रममा कोरिया रहनु भएका विद्यार्थी, अनुसन्धानकर्ता, प्राध्यापक तथा विशिष्ट व्यक्तिको उपस्थिति रहने र त्यसको लागि आवश्यक सम्पूर्ण तयारीहरु पुरा भएको स्थानिय आयोजक कमिटिका संयोजक प्रकाश राज पाण्डेयले बताउनु भयो।

यस शैक्षिक सेमिनार विद्यार्थीहरुको निम्ति विचारको आदानप्रदान गर्ने, ज्ञानवर्दकका साथसाथै, सबै जनासंग भेटघाटको पनि राम्रो अवसर होस भन्ने कार्यक्रमको उद्देश्य रहेको कार्यक्रमका सह-संयोजक प्रकाश देवकोटाले बताउनु भयो । उहाँले कार्यक्रम सम्पूर्ण विद्यार्थी र अनुसन्धानकर्ताहरुको लागि फलदाई हुने बिश्वास प्रकट गर्नु भयो।

सोनसिकले कोरियामा रहेका नेपाली विद्यार्थीहरुलाई लक्षित गर्दै यस्ता कार्यक्रमहरु वार्षिकरुपमा गर्दै आएको र सोनसिक १४ औ कार्यसमितिले पनि यसलाई निरन्तरता दिदै छैटौं शैक्षिक सेमिनार आयोजना गरेको र कर्यक्रमको तयारि अन्तिम चरणमा पुगेको सोनसिक सभापति विजय बस्नेतले बताउनु भएको छ।

कार्यक्रममा सहभागी हुनको लागि अनलाइन दर्ता फारम खोली सकिएको र साथै कार्यक्रममा अनुशन्धान तथा जानकारीमुलक पोस्टर पनि सहभागी गराइने हुदा, सम्पूर्ण इच्छुक सहभागीहरुलाई आफ्नो अनुशन्धान तथा जानकारीमुलक पोस्टरको abstract पठाउनको लागि पनि सभापति बस्नेतले अनुरोध गर्नु भयो ।

कार्यक्रम आयोजक कमिटीले कोरियामा रहनु भएका सम्पूर्ण विद्यार्थी, अनुसन्धानकर्ता, प्राध्यापक तथा विशिष्ट व्यक्तिलाई कार्यक्रममा उपस्थितिको लागि निमन्त्रण गर्दै , उत्कृष्ट ५ पोस्टरहरुलाई पुरस्कृत गरिने र सहभागी सबैलाई प्रमाणपत्र प्रधान गर्ने जनाएको छ । सोनसिकले विद्यार्थीहरुको लागि गर्दै आएको विभिन्न किसिमका शैक्षिक कार्यक्रमहरुले विदेशमा पनि मिलिजुली सहकार्य गर्ने साथै विद्यार्थीहरुको चैतर्फी विकासमा सहयोग पुर्याएको छ ।