तमु धीं दक्षिण कोरियाको बृहत भेला सम्पन्न सँगै जित गुरुङको नेतृत्वमा आठौं कार्यसमिति चयन
बोम्जन गुरुङ, दक्षिण कोरिया ।
“स्वदेश तथा विदेशका सम्पूर्ण तमुहरु एक हौं, आफ्नो पहिचान प्ये, छ्या, ल्हु लाई विश्वब्यापी बनाऔं” भन्ने मूल नाराका साथ “तमु बृहत भेला-२०१८” फेब्रुअरी १५ तारिक बिहीबारका दिन सउल-सिन्सोलदोङ स्थित नेपाल हाउसमा सम्पन्न भएको छ । सोही भेलाबाट तमु धीं दक्षिण कोरियाको आगामी दुई बर्षको कार्यकाल रहने गरि आठौं कार्यसमितिको चयन पनि भएको छ ।
सन् १९९९ मा स्थापना भएको तमु धीं दक्षिण कोरियाले कोरियन नयाँ वर्ष सलनालको लामो विदाको अवसर पारेर तमु (गुरुङ) हरुको बाक्लो उपस्थिति सहित यस बृहत भेलाको आयोजना गरेको हो । बृहत भेलाले संस्थाका संरक्षक भिम गुरुङको संयोजकत्वमा सूरज गुरुङ, भिम गुरुङ (लमजुङ), धर्म गुरुङ र भावना गुरुङ लगायतका ४ सदस्यीय रहने गरि निर्वाचन मण्डल गठन गरि प्रक्रियागत रुपमा सर्वसम्मत नव कार्यसमितिको चयन गरेको हो ।
नव गठित आठौं कार्यसमितिका अध्यक्ष लगायत सम्पूर्ण पदाधिकारी एवं सदस्यहरुलाई संस्थाको विधान अनुरुप विधिवत् रुपमा संस्थाका संरक्षक भिम गुरुङ (पर्वत) ले शपथ ग्रहण गराउनुभएको थियो ।
सोही अवसरमा संस्थासँग आबद्व भएर गुरुङ तथा नेपाली संस्कृति झल्कने साँस्कृतिक प्रस्तुति दिएर सहयोग र सहकार्य गर्नुहुने स्थानीय कलाकारहरुलाई सम्मान समेत गरिएको थियो । कार्यक्रममा उपस्थित हुनुहुने समस्त तमु, गैर तमु महानुभावहरुलाई तमु धीं दक्षिण कोरियाले स-धन्यवाद हार्दिक आभार व्यक्त गरेको छ । पहिलो खण्डको औपचारिक कार्यक्रम सञ्चालन संस्थाका सल्लाहकार गुप्त गुरुङ र दोश्रो खण्डको कार्यसमिति चयनको कार्यक्रम पूर्वाध्यक्ष तथा सल्लाहकार सुरज गुरुङले सञ्चालन गर्नुभएको थियो ।
तमु धीं दक्षिण कोरियाको आठौं कार्यसमितिको १३ सदस्यीय स्वरुप यसप्रकार रहेको छ ।
अध्यक्ष – जित गुरुङ (लमजुङ)
वरिष्ठ उपाध्यक्ष – एक बहादुर गुरुङ (पर्वत)
उपाध्यक्ष – ईन्द्रराज गुरुङ (कास्की)
महासचिव – लेसन गुरुङ (स्याङ्जा)
सचिव – नन्दजंग गुरुङ (कास्की)
सचिव – रेख गुरुङ (संखुवासभा)
कोषाध्यक्ष – रुपा गुरुङ (बागलुङ)
सह-कोषाध्यक्ष – नरेन्द्र गुरुङ (स्याङ्जा)
सदस्य – टेक बहादुर गुरुङ (स्याङ्जा)
सदस्य – तुरन गुरुङ (कास्की)
सदस्य – तेज गुरुङ (कास्की)
सदस्य – लिल गुरुङ (स्याङ्जा)
सदस्य – मञ्जु गुरुङ (स्याङ्जा)
