दक्षिण कोरियामा कार्यरत पूर्व विद्यार्थीले विद्यालयलाई सहयोग

दोलखा वैतेश्वर गाँउपालिका पुतलीकाठको जनज्योती माध्यमिक विद्यालयका पाँच जना पूर्व विद्यार्थीहरुले विद्यालयलाई कम्प्युटर, स्टेशनरी र खेल सामाग्री दिएका छन् ।

बैदेशिक रोजगारीको सिलसिलामा दक्षिण कोरिया रहेका सरोज के.सी, रामकाजी श्रेष्ठ, चन्द्र कुमार घिसिङ, दिपकराज गिरी र सुमन तामाङले १ लाख ४३ हजार ५ सय २६ रुपैया बराबरको ३ थान कम्प्यूटर र ३५६ जना विद्यार्थीको लागी स्टेशनरी तथा खेलकूद सामाग्री वितरण गरेका हुन् । आइतबार विद्यालयमा एक साँस्कृतिक कार्यक्रम गरि सो सामाग्रीहरु वितरण गरिएको थियो ।
कार्यक्रममा वैतेश्वर गाँउपालिकाका उपाध्यक्ष रविचन्द्र आचार्यले यसरी विद्यालयलाई सहयोग गरेकोमा खुशी ब्यक्त गरे । विद्यालयका प्रधानाध्याक केदार प्रसाद काफ्ले पढेर गएका विद्यार्थीले फेरी विद्यालयलाई सम्झिकोमा धन्यबाद दिए । ‘पहिले पढ्ने भाइहरुले विद्यलयको हितमा सोचेर सहयोग गर्नु भयो । हामी खुशी छौ ।’ उनले थपे ।
विद्यालयका पूर्व विद्यार्थी तथा दोलखाली समाज दक्षिण कोरियाका अध्यक्ष सरोज केसीले विद्यालयले गर्दा आफ्नो जीवन परिवर्तन भएको स्मरण गर्दै आफूहरुले गरेको सहयोगले अहिले पढ्दै गरेको विद्यार्थीको पढाईको थप सहयोग हुने आशा ब्यक्त गरे । ‘हामी कोरियामा गाह्रै काम गरेर भए पनि केही आम्दानी गरि रहेका छौ । साथीभाइ मिलेर आफूले पढेको विद्यालयलाई सहयोग गर्न सकियो । खुशी लाग्यो ।’ उनले भने ।
सांस्कृतिक कार्यक्रममा वैतेश्वर गाँउपालिका वडा नं १, २ र ३ का ६ वटा विद्यालयको सहभागिता रहेको थियो । जनज्योती मावि पहिलो, गौरीशंकर प्रावि दोस्रो, कैलेश्वर प्रावि तेस्रो भएको थियो भने हिमालय प्रावि सान्त्वना भएको थियो । विजयी प्रतियोगीहरुलाई नगद तथा स्टेशनरी सामाग्री पुरस्कार वितरण गरिएको थियो ।