कोरियामा पत्रकारिता तालिम हुँदै
नेपाल आदिवासी जनजाति पत्रकार महासंघ (फोनिज) र तामाङ पत्रकार संघ दक्षिण कोरियाले यही सेप्टेम्बर ९ तारिख आइतबार एक दिने आधारभूत समाचार लेखन तालिम गर्ने भएको छ । सउलमा हुने कार्यक्रममा पत्रकार गोकुल थोकर, बाला राई र डम्बर सुब्बाले तालिम दिनेछन् ।
‘विदेशमा भएका साथीहरु समाचार लेख्न चाहन्छन् तर सिप र शब्दको प्रयोग गर्न जान्दैनन् । त्यस्ता साथीहरुका लागि यो तालिम हो’, आयोजक संस्था तामाङ पत्रकार संघ, दक्षिण कोरियाका अध्यक्ष सिमा लामाले भनिन् । ‘दक्षिण कोरियामा बसेर पत्रकारिता सिक्न चाहनेहरुका लागि एकदमै उपयोगी हुन सक्छ । प्रशिक्षकहरु पनि पत्रकारिता क्षेत्रमा लामो समय देखि काम गर्दै आउनु भएको ब्यक्तित्वहरु हुनुहुन्छ ।’
तालिममा प्रशिक्षकका रुपमा रहेका गोकुल थोकर र बाला राई आमसञ्चार र पत्रकारितामा स्नातकोत्तर गरेर पत्रकारिता गरिरहेका पत्रकार हुन् । नेपालमा हुदा थोकरले नेपाल वातावरण पत्रकार समूह (नेफेज)मा पाँच बर्ष भन्दा बढि डकुमेन्ट्री निर्देशन, उत्पादन गरेका छन् । उनले त्यस अघि विभिन्न रेडियो र पत्रपत्रिकामा काम गरिसकेका छन् । हाल फोनिज कोरियाका सम्पादक छन् ।
पत्रकारितामै स्नातकोत्तर गरेकी बाला राईले भारतको नयाँ दिल्लीस्थित इण्डियन इन्स्टिच्युट अफ मासकम्युनिकेशन(IIMC)बाट सन् २०१० मा विकास पत्रकारितामा डेप्लोमा कोर्ष गरेकी छिन् । नेपालबाट सन् २००२ देखि प्रकाशनमा आएको राष्ट्रिय दैनिक पत्रिका अन्नपुर्ण पोष्टमा(२००२ -२०११) सम्म रिपोर्टरको रुपमा काम गरेकी राई विशेषगरी फिचर समाचार लेखनमा दख्खल राख्ने गर्छिन् । उनी हाल फोनिज कोरियाको प्रधान सम्पादक छिन् ।
त्यसैगरी लामो सयमदेखि दक्षिण कोरियामा रहेर पत्रकारिता गरि रहेका अर्का वरिष्ठ पत्रकार हुन् डब्बर सुब्बा । सुब्बाले कोरियामा नेपालीले भोगि रहेका दुःखसुःखलाई आफ्नो क्यामरामा कैद गरेका छन् , शब्दमा उतारेका छन् । दक्षिण कोरियामा नेपाली पत्रकार माझ छुट्टै स्थान बनाएका डम्बर सुब्बा हाल यमडब्लु टिभीमा कार्यक्रम उत्पादन गर्नुका साथै नेपाली कोरिया डट कम अनलाईनको प्रधान सम्पादक पनि हुन् ।
प्रवासमा रहेर पनि फुर्सदको समयमा पत्रकारिता गर्न रुचाउनेहरुका लागि यो आधारभूत समाचार लेखन तालिम उपयोगीमूलक रहने आयोजकले विश्वास गरेको छ ।
