दक्षिण काेरियामा रहेका नेपालीकाे दशै
दशै नेपालीका लागि ठूलो चाड । देशमा हुनेले त आफन्त, मान्यजन र साथीभाइसँग भेटे । आर्शिबाद लिए । रमाइलो गरे । विदेशमा भएका नेपालीका बाध्यता आफ्नै छन् । भनेको बेला छुट्टि मिल्दैन आफ्नो छुट्टि भएको बेला साथीभाइको हुँदैन । रमाइलो गरौ भन्दा भन्दै यस्ता चाडवाड सकिन्छन् । मनमा गाउँघर र आफन्तबाट टाढिनुको पीडा त हुन्छ नै तै पनि कसरी रमाइलो गर्छन् त विदेशमा भएका नेपालीहरु चाडबाडको बेला ? हामीले दक्षिण कोरियामा रहेका केही नेपालीहरुको दशै कसरी बित्यो भनेर कुराकानी गरेका छौ ।
तारा नारायण राजभण्डारी
परदेशमा भए पनि घटस्थापना कै दिन जौ,मकैको जमरा बिधि अनुसार नै राखियो । फुलपातिमा दाइ दिदी र साथीहरूसँग बेलुका बसेर भोज खाई रमाईलो गरियो । अष्ठमीको दिन पनि रमाइलो भो । नारायणी प्यालेसमा साथीभाइ मिलेर नाचगान गरियो ।
दशै टिकाको दिन विहान भगवान दुर्गा माता पुजा गरि रेस्टुरेण्टमा दाइ उत्तर राजभण्डारीको हातबाट म मेरी श्रीमती निर्मला र नेपालबाट दशैको बिदामा यता आएका भतिज उत्सभ राजभण्डारी मिलेर टीका ग्रहण गरियो । साथै काम छोडेर सेल्टरमा बसेका भाइहरू र बाहिरबाट आउनु भएको गेस्टहरू गरि लगभग २५ जना लाई मैले नै टिका लगाइ दिएँ । मलाई पनि परिवार संगै दशै मनाएको अनुभव भयो । बिदेशमा भए पनि हाम्रो नेवारी परम्परा अनुसार भोज र सेल रोटी खायौ ।
गोपाल भन्डारी
गाउँ घरमा भएको भए छुट्टै रमाइलो हुन्थ्यो । पीङ हालिन्थ्यो । साथीभाइ देश विदेशबाट आउने हुँदा भेटघाट हुन्थ्यो । अलि अलि तास पनि खेलिन्थ्यो । चार बर्ष भो बिदेश लागेको । अब चाहि दशै जस्ता चाड सम्झनामा मात्र छन् । यसपाली अरु दिन काम नहुने कम्पनीमा दशैको बेला नै पुरै नाइट ट्युटी गर्नु पर्यो । काम नगरौ कति पछि काम चलेको कम्पनीमा, गरौ हाम्रो चाडबाड । आइतबार सम्मै नाइट ड्युटीको काम गरियो । त्यसै बित्यो यो बर्षको दशै । अब राम्रोसँग चाडबाड मनाउने भनेको देशमै गएर होला ।
सुमन केसी
चाडबाडको बेला घरपरिवार, आफन्त, इष्टमित्रको याद आउने नै भयो । कोरियामा साथीहरु छन् । परिवारको यादलाई भुलाउन पनि साथीभाइसँग घुम्नै पर्यो । यो दशैमा पोछनस्थित नेपाली रेष्टुरेण्टमा दशै नाइट डिजे पार्टी थियो । सबै साथीभाई जम्मा भई त्यही दशैको टिका लगायौ । रमाइलो भो ।
टिकाको दिन भिडियो कलबाटै बुवा आमासँग कुराकानी भो । भिडियो कलबाटै टिका र आशिर्वाद थापेँ । परिवार सम्झेर भाबुक पनि भएँ । गाउँघरको याद खुब आयो । साथीभाइ पनि सम्झिएँ । यस्तै हो विदेश भनेर आफैले आफैलाई सम्झाएँ ।
जनक कुँवर
विदेशको दशैको कुरा के गर्नु ? दक्षिण कोरियामा विद्यार्थी भिजामा छु । काम गर्नु पर्यो, पढ्नु पनि पर्यो । व्यस्त छ जिन्दगी । दुःख छ । देशमा दशै नमनाएको पनि सात वर्ष हुनै लाग्यो । सधै विदेश तिरै हुने । यस पटक साथीभाइ मिलेर खसीको मासु मगायौ । घरमै पकायौ खायौ । कलेजका साथीभाइ मिलेर देशै कार्यक्रम गरेर रमाइलो गर्यौं । दाइहरुले टिका लगाइदिए । विदेशमा भए पनि निधार खाली बसेन ।
उषा रानामगर
दशै भन्ने वित्तिक्कै नयाँ लुगा र दक्षिणा सम्झन्छु । सानी हुँदा ठूलाले टिका लगाए पछि दिने दक्षिणाको कम्ता महत्व थिएन् । पैसा थोरै हुन्थ्यो । खुशी धेरै हुन्थ्यो जस्तो लाग्छ । विदेशी आएपछि नेपाली चाडपर्व धेरै याद आउने रहेछ । घरमा सेतो टिका लगाउछौ । अरु नेपालीको घरमा जस्तै परिकार पाक्छन् । घरमा मासुका परिकार बन्छन् । तर मासु बाहिरबाट किनेर ल्याउने चलन छ । कुनै काटमार गरिदैन । कोरियामा आएको दुई बर्ष भयो । दुबै दशै खासै रमाइलो भएन । साथीभाइसँग रमाइलो गरौ भन्दा पनि मिलेन । कम्पनीमै बित्यो दुबै दशै ।
