तामाङ संघ दक्षिण कोरियाले ‘तामाङ धिम’ संचालन गर्ने

नेपाल तामाङ संघ दक्षिण कोरियाले तामाङ धिम (घर) संचालनमा ल्याउने भएको छ । सउलको दोङदेमुनमा संचालन हुने धिमको नोभेम्बर ४ आइतबार औपचारिक उद्घाटन हुनेछ ।
‘दक्षिण कोरियामा ईपीएसबाट आउने तामाङहरु धेरै भए । काम छोडेर बसेका साथीहरुलाई अप्ठ्यारो परेकोले हामीले धिमको सुरुवात गरेका हौ ।’ संघका अध्यक्ष मेघप्रसाद वाईवाले भने । ‘धिममा हामी तामाङ संस्कृति झल्काउने गरि सजावट पनि गर्दैछौ । यसका लागि हामी दक्षिण कोरियामा रहेका सबै तामाङ दाजुभाइ दिदीबिहनीको सल्लाह सुझाबको अपेक्षा गर्दछौ ।’ उनले थपे ।
उद्घाटन कार्यक्रम विहान ११ बजे सुरु हुने आयोजकले जनाएको छ । नागार्जुन गुम्बाका लामा प्रमुख उर्गेन लामा तथा सउल गुम्बाका लामा प्रमुख कुन्सङ दोर्जे लामाले बौद्ध पराम्परा अनुसार धार्मिक पुजापाठ गर्नेछन् । कार्यक्रममा दक्षिण कोरियामा रहेका तामाङ लगाएत सम्पूर्ण नेपालीलाई उपस्थित भैदिन पनि आयोजकले अनुरोध गरेको छ ।