तमु धीं दक्षिण कोरियाले फो ल्होछार

“प्ये म्हस्याँ छ्या म्हमु, छ्या म्हस्याँ छ्या ल्हु म्हमु, ल्हु म्हस्याँ म्हि म्हमु“ अर्थात् “शास्त्र हराए, संस्कार हराउँछ, संस्कार हराए संस्कृति हराउँछ, संस्कृति हराए मान्छे (जाति) नै हराउँछ ।“
दक्षिण कोरियामा रहेका तमु (गुरुङ) हरुले आफ्नो मौलिक पहिचान, कला, संस्कार र सँस्कृति तथा परम्परालाई बचाई राख्न तमु धीं दक्षिण कोरियाले विगतका वर्षहरुमा जस्तै यो पटक पनि फोल्हो (मृग वर्ग)को ल्होसार जनवरी ६ मा आयोजना गर्ने भएको छ ।
सउलमा हुने कार्यक्रमका लागि अहिले व्यवस्थापनको काम भैरहेको तमु धीं दक्षिण कोरियाका अध्यक्ष जित गुरुङले जानकारी दिए । ‘हामीले अक्टोबर २८ तारिकमा मिटिङ राखेका थियौ । यही मिटिङले नेपालबाट आउने कलाकार छनौट, हल व्यवस्थापन, साँस्कृतिक समिति, खानपिन व्यवस्थापन समिति तथा विभिन्न उपसमिति बनाएको छ । यही समितिहरुले अहिले काम गरि रहेको छ ।’ उनले भने ।
यस पटकको ल्होछारमा पनि नेपालबाट कलाकार ल्याउने निर्णय भएको छ । नेपाली लोक तथा दोहोरी क्षेत्रका चर्चित गायिका, गुरुङ चलचित्रकी नायिका तथा मोडल काजल गुरुङको गायन र नृत्यकलाले दर्शकहरुलाई मोहित बनाउने कुरामा आयोजक ढुक्क छ । “बुझें मैले नि“, “नाकमा झुम्के बुलाकी“, “नौ रङ्गी सपना“, “सालैजो“ लगायत थुप्रै लोक तथा दोहोरी गीतमा आफ्नो सुमधुर आवाज दिईसकेकी गुरुङले चलचित्र डिठ्ठा (मुखिया)मा नायिकाका भूमिकामा अभिनय गरेकी छिन् । उनले थुप्रै म्यूजिक भिडियोमा मोडलिङ समेत गरिकी छिन् ।
गुरुङ समुदायमा चर्चित कलाकार काजलले ल्होसारको रौनकता र माहौललाई रंगीन र संगीतमय बनाउनेमा कलाकार व्यवस्थापन संयोजक हिमानी गुरुङ बताउँछिन् । बहु प्रतिभाशाली कलाकार गुरुङले नेपालका विभिन्न गाउँ, शहरका मेला महोत्सवहरुमा सयौं भन्दा बढि स्टेज कार्यक्रमहरु साथै यस अघि जापान, हङकङ, युके तथा कतार लगायतका देशमा आफ्नो प्रस्तुति दिइसकेकि छिन् ।
ल्होसारको दिन तमु (गुरुङ)को बाजागाजा सहित छैंडु नाच, गुरुङ समुदायको लोपोन्मुख मारुनी नृत्य, कौरा नृत्य, स्थानीय कलाकारहरुको बेजोड साँस्कृतिक प्रस्तुति र हाँस्य प्रहशन रहने संस्थाका साँस्कृतिक विभाग संयोजक सबिन गुरुङले जानकारी दिए । सुविधा सम्पन्न हलमा आयोजना हुने यस कार्यक्रममा तमु (गुरुङ) हरुको रमाईलो जमघट सँगै स्वादिष्ट नेपाली अचार, मासु, भुटुवा, सेलरोटी सहित थुप्रै खानाको परिकारको व्यवस्था गरिने हल व्यवस्थापन संयोजक तथा संस्थाका संरक्षक सल्लाहकार भिम गुरुङ बताए ।
कोरियामा रहेका सम्पूर्ण तमु (गुरुङ) दाजुभाइ तथा दिदीबहिनीहरु, सबै संघ(संस्थाहरु, बुद्धिजीबीहरु, पत्रकारहरु, व्यवसायीहरुलाई निमन्त्रणा पत्र पठाउने र प्रचार प्रसार तीव्र बनाएको तमु धींका महासचिव लेसन गुरुङले बताए । २०१९ जनवरी ६ आइतबारका तमु (गुरुङ) फो ल्होसार कार्यक्रममा आउन र सो दिन अन्य कार्यक्रम नजुधाई दिन पनि उनले अनुरोध गरे ।