नेपाली सम्पर्क समिति (एनसीसी)को रजतजयन्ति सम्पन्न
दक्षिण कोरियाको सबैभन्दा पुरानो संस्था नेपाली सम्पर्क समिती (एनसीसी)ले २५औं बर्ष पुरा गरको उपलक्ष्यमा रजत जयन्ति कार्यक्रम सम्पन्न भएको छ । आइतबार सउलमा भएको कार्यक्रम तोकिएको समय भन्दा तीन घन्टा पछि सुरु भएको कार्यक्रममा एनसीसीको स्मारिका नेपाली शन्देस लोकार्पण गरिएको थियो ।
एनसीसीको २५ बर्ष पुगेको संस्थाको रजत जयन्तिमा पनि नेपाली राजदुतावासको प्रतिनिधि नआउनु भनेको निक्कै दुःख लाग्दो भएको कुरा नेपाली सम्पर्क समितिका बरिष्ठ अपाध्यक्ष श्रीप्रसाद श्रेष्ठले भने । ‘हामीले उहाँहरुलाई निमन्त्रणा गरेका हौ उहाँहरु आउनु भएन यो भन्दा दुःख लाग्दो कुरा के हुन्छ ?’ उनले प्रतिप्रश्न गरे ।
कार्यक्रमका प्रमुख अतिथी नेपालबाट आएका निरज थापाले एनसीसीले गरेका पुराना दिनहरु सम्झिए । उनले एनसीसी भन्दा पहिले कोरियामा भएका नेपालीले धेरै दुःख पाएको सम्झिए । ‘यो संस्था आबश्यक्ताबाट जन्भिएको हो । हामीले त्यो बेला धेरै दुःख पाएका थियौ । त्यसैले यो संस्था जन्मियो । अहिले कोरियामा धेरै संस्था छन् भन्ने सुनिन्छ यो राम्रो पक्ष हो । सबै संस्थाले केही न केही त काम गरेका छन् । यसको सुरुवात एनसीसीले गरेको त्यसैले पनि यो संस्था सबैको अभिभाबक भएको हो ।’ उनले भने ।
एनसीसीको १६ कार्यसमितिले संस्थालाई औपचारिक रुपमा दर्ता प्रक्रियामा गएको अध्यक्ष अन्जु केसीले बताइन् । ‘हामीले लगभग धेरै काम गरेका छौ । यस संस्थालाई औपचारिक रुपमा दर्ता गर्न । शायद मेरै कार्यकालमा संस्थाको दर्ता हुन्छ कि ?’ उनले भनिन् । ‘एनसीसीलाई यहाँसम्म आउन जसले जे जस्तो सहयोग गर्नु भयो सबैलाई आभार ब्यक्त गर्छु । यो निरन्तरता पछि सम्म होस ।’
कार्यक्रममा लेडिया बेको (कोरिएन दिदी), गैर आवसीय नेपाली संघ एनआरएनएकी अध्यक्ष लक्ष्मी गुरुङ, एनसीसीका पुर्व अध्यक्ष रामहरी गुरुङ, एनसीसीका संरक्षक केपी सिटौला, एनसीसीकै पुर्व अध्यक्ष लोचन राई, एमटियु अध्यक्ष उदय राई लगाएतका अतिथीहरुले कार्यक्रममा शुभकामना शन्देश दिएका थिए ।
कार्यक्रममा नेपाली मौलिक पन्चेबाजाले धेरैको ध्यान तानेको थियो । नेपालबाट आएका प्रतिनिधि कृष्ण प्रसाद अधिकारीले एनसीसीको प्रगति बारेको कविता वाचन गरेका थिए । दक्षिण कोरियामा रहेका विभिन्न संघ सस्थाका प्रतिनिधि पत्रकारहरुलाई सामाजिक कार्यका लागि सम्मान गरिएको थियो ।
