कोरियामा तनाब व्यवस्थापन र स्वेच्छिक घर फिर्ती सम्बन्धी अन्तरक्रिया सम्पन्न : अबैधानिक रुपमा कोरियामा नबस्न राजदुत सिंहको आग्रह
दक्षिण कोरियामा तनाव व्यवस्थापन, स्वेच्छिक घरफिर्ती एवम् समसामयिक सचेतना विषयमा एकदिने गोष्ठी सम्पन्न भएको छ । नेपाली राजदुतावास दक्षिण कोरिया र छनान बैदेशिक रोजगार सहयोग केन्द्रले संयुक्तरुपमा सो कार्यक्रमको आयोजना गरेको हो ।
कार्यक्रममा दक्षिण कोरियाका लागि नेपाली राजदुत अर्जुनजंग बहादुर सिंहले इपिएस लगायत अन्य माध्यमबाट दक्षिण कोरिया आएका नेपालीलाई गैरकानुनी वा शरणार्थी भिसा बनाएर कोरिया नबस्न अनुरोध गरे । उनले कोरियामा गैरकानुनी रुपमा बस्ने नेपालीको संख्या बढ्दै गएको प्रति चिन्ता व्यक्त गर्दै एउटा नेपाली गैरकानुनी रुपमा बस्दा अर्को नेपालीको रोजगारी गुम्ने सक्ने बताए ।
‘भिसा अवधि सकिएर नेपाल फर्केर आफूले सिकेको सीप र पैसालाई सही ठाउँमा लगानी गर्नुस् । हामीले नेपालको आर्थिक एवम् औद्योगिक क्षेत्रमा लगानी भित्राउन कोरियन सरकारसंग छलफल अघि बढाएका छौ । यसबाट सम्पूर्ण नेपालीलाई फाइदा पुग्छ तर गैरकानुनी तवरले यहाँ बसिदिदा नेपालको छवि धमिलिन सक्छ यसतर्फ सचेत बनौ ।’ उनले भने ।
कार्यक्रममा तनाव व्यवस्थापन सम्बन्धी परामर्शका लागि नेपालबाट कोरिया आएका मनोचिकित्सक केदार बहादुर रायमाझीले जीवनमा प्रत्येक व्यक्ति ७ पटकसम्म डिप्रेशनमा जाने बताए । उनले विश्वमै पहिलो स्वास्थ्य समस्याको रुपमा डिप्रेशन भएको उल्लेख गरे । ‘जब नचाहेको, नसोचेको घटना हुन्छ, त्यसलाई सहज रुपमा लिन नसक्दा मानसिक तथा शारिरीक समस्या आउछ । त्यसैबाट तनाव उत्पन्न हुन्छ । डिप्रेशन हुन्छ । जे प्राप्त छ त्यसैबाट सन्तुष्टी लिन सक्नुपर्छ अनि मात्र तनावमुक्त हुन सकिन्छ । डिप्रेशनबाट बच्न सकिन्छ ।’ उनले भने ।
