तमु धीं दक्षिण कोरियाले काजल गुरुङ सँगै मनाउने तमु ल्हाेछारकाे तयारी पूरा

तमु धीं दक्षिण कोरियाले यही जनवरी ६ तारिख आइतबार सउलमा मनाउने तमु ल्होसार तयारी पूरा गरेको छ । गुरुङ जातिको संस्कार अनुसार वर्ग चक्र अन्तर्गत खी(ल्हो (कुकुर वर्ग) लाई विदाई गर्दै फो(ल्हो (मृग वर्ग) लाई स्वागत गरि स्यों(कैं (दिवा भोज), शुभकामना आदानप्रदान तथा विविध साँस्कृतिक कार्यक्रम आयोजना गर्ने भएको हो ।
दक्षिण कोरियाको राजधानी सउलको सुविधा सम्पन्न हल AW कन्भेन्शन सेन्टर (हारिमगाग) हलमा ल्होछार मनाउने छ ।
‘हामीले सबै तयारी पुरा गरि सकेका छौ । अब आइतबार हाम्रो संस्कार र संस्कृति झल्काउने गरि कार्यक्रम गरिनेछ ।’ तमु धीं दक्षिण कोरिया केन्द्रिय अध्यक्ष जित गुरुङले भने ।
नेपालबाट आमन्त्रित कलाकार काजल गुरुङको विशेष प्रस्तुति रहने गरि कार्यक्रमका लागि हल व्यवस्थापन, साँस्कृतिक समिति, खानपिन व्यवस्थापन समिति तथा विभिन्न उपसमिति गठन सँगै तमु (गुरुङ) समुदायको महान् पर्व फोल्होछारको तयारी पूरा भएको हो ।
गत डिसेम्बर ३० तारिक थेगुमा ल्होछार गरिएको भएको थियो । आइतबार हुने कार्यक्रमका लागि कलाकार कागज गुरुङ जापानको कार्यक्रम सकेर दक्षिण कोरिया आइपुगेकी छिन । काजलसँगै कार्यक्रममा स्थानीय कलाकारहरुद्वारा तमु (गुरुङ)को मौलिक बाजागाजा सहित छैंडु नाच, लोपोन्मुख घाँटु तथा मारुनी नृत्य र कौरा नृत्य जस्ता बेजोड साँस्कृतिक प्रस्तुति साथै हाँस्य प्रहशनबाट आनन्दित हुने अवसर दर्शकहरुले प्राप्त गर्नेछन् ।
यस कार्यक्रममा रमाईलो जमघट सँगै स्वादिष्ट नेपाली परिकारको व्यवस्था गरिने र कार्यक्रम दिउँसो १२ बजेदेखि ७ बजेसम्म हुने संस्थाका केन्द्रिय महासचिव लेसन गुरुङले जानकारी गराएका छन् ।
आमन्त्रित अतिथि तथा दर्शकहरुको उत्साहजनक उपस्थितिको अपेक्षासँगै कोरियामा रहेका सम्पूर्ण तमु (गुरुङ) दाजुभाइ तथा दिदीबहिनीहरु, सबै संघसंस्थाहरु, बुद्धिजीबीहरु, पत्रकारहरु, व्यवसायीहरुलाई निमन्त्रणा पत्र पठाउने र प्रचारप्रसारको कार्य पनि व्यापक रुपमा पूरा गरिएको छ ।
यदि सूचना वा पत्र प्राप्त नभए तमु धींको आधिकारिक फेसबुक सूचनालाई आधार मानेर २०१९ जनवरी ६ तारिक आइतबारका दिन उपस्थित जनाई तमु (गुरुङ) फो ल्होछार कार्यक्रम सभ्य र भव्य सफल पारिदिनु हुन र सो दिनमा अन्य कार्यक्रम नजुधाईदिन तमु धीं दक्षिण कोरियाले सबै संघसंस्थालाई अनुरोध गरेको छ ।