किम्हे लाईभदोहोरी साँस्कृतिक कार्यक्रम भव्यताका साथ सम्पन्न
स्याङ्जा परिवार दक्षिण कोरिया किम्हे/बुसान शाखाद्वारा जिल्लाको ग्रामीण स्वास्थ्य क्षेत्र सहयोगार्थ फेब्रुअरी ३ तारिख किम्हेमा पहिलोपटक आयोजित किम्हे लाईभदोहोरी साँस्कृतिक कार्यक्रम भव्यताका साथ सम्पन्न भएको छ।
“हाम्रो संस्कृति,हाम्रो पहिचान ! लोक जागरण,हाम्रो अभियान !!” भन्ने मुल नारा सहित आयोजित कार्यक्रम शाखाका अध्यक्ष जीवलाल काफ्लेको सभापतित्वमा सम्पन्न भएको थियो। कार्यक्रमको प्रमुख अतिथि किम्हे माईग्रेन्ट सेन्टरका सञ्चालक यज्ञराज सुवेदी, विशेष अतिथिहरुमा स्याङ्जा परिवार दक्षिण कोरिया केन्द्रका अध्यक्ष युवराज गुरुङ,केन्द्रिय वरिष्ठ सल्लाहकारद्वय गुप्त गुरुङ र धर्म गुरुङ, संस्थाको थेगू शाखा अध्यक्ष विरेन्द्र नौभाग्य, एनसीसी बुसानका अध्यक्ष संगीत अधिकारी रहेका थिए । यसैगरि अतिथिहरुमा संस्थाको केन्द्रिय सल्लाहकारहरू, विभिन्न संघसंस्थाका प्रतिनिधिहरू रहेका थिए।
शाखाको वरिष्ठ सल्लाहकार नवराज वाग्लेको स्वागत मन्तव्यसँगै शुरु भएको कार्यक्रमको पहिलो चरणको औपचारिक कार्यक्रममा थेगू शाखाका अध्यक्ष विरेन्द्र नौभाग्य, एनसीसी बुसानका अध्यक्ष संगीत अधिकारी, केन्द्रका अध्यक्ष युवराज गुरुङले शुभकामना मन्तव्य राखेका थिए । यसैगरि प्रमुख अतिथि यज्ञराज सुवेदीले प्रवासी भूमिमा पनि आफ्नो मौलिक कला र संस्कृतिको संरक्षणमा आयोजकले गरेको प्रयासको प्रशंसा गर्दै कार्यक्रम सफलताको शुभकामना राखे ।
नेपाली मौलिक बाजागाजाको सुमधुर धुनहरुको लाइभ प्रस्तुतिसँगै शुरु भएको सांस्कृतिक कार्यक्रममा कोरियामा स्थापित चर्चित लोकदोहोरी गायिका रमिला गौतम, लोकदोहोरी गायक सुमन चापागाँई, लोकदोहोरी गायक रेशम अर्याल र शैलेश रानाले आ-आफ्नो प्रस्तुति राखेर उपस्थित दर्शकहरुलाई नचाएका थिए । यसैगरि लोकदोहोरी गायक सुरज के.सी.र लोकदोहोरी गायिका पारु आलेको दोहोरी घम्साघम्सीले कार्यक्रम थप रोमाञ्चक बनाएको थियो ।
नेपालबाट आमन्त्रित ईमेज लोक कलाकार पब्लिक च्वाईस विजेता चर्चित नवउदयमान लोकदोहोरी गायक नर बहादुर राना (सुरेश) ले आफ्नै सालैजो गीत बरिखा लाँउदा, यानीमाया, पान खायो मायाले र चर्चित मौलिक लोकदोहोरी गीत उही खोलीमा पानी गाएर दर्शकलाई नचाएका थिए । यसैगरि नेपालबाट अाएका लोकदोहोरी गायक खुमन अधिकारीले आफ्नै चर्चित गीतहरु स्याङ्जाली झापाली, पञ्चेपाजा, दोहोरीमा र्याप लगायत आधा दर्जन गीत गाएर पसिना छुट्नेगरि दर्शकलाई नचाएका थिए । यसैगरि नेपालबाटै अाएकी डान्सर प्रिति आलेले आफ्नै बहुचर्चित गीत फुल्यो बामरी, बेली डान्स र दोहोरी ब्याटल गाएर दर्शक संगसंगै नाचेका थिए । कार्यक्रमको मुख्य आकर्षण भने आधींखोला उर्लेर आयो भाकामा खुमन अधिकारी र प्रिति आलेको करिब आधा घण्टा सम्म चलेको दोहोरी घम्साघम्सी बनेको थियो। प्रिति आलेले खुमनसंग मात्र नभएर नर बहादुर राना संग खेलेको दोहोरी घम्साघम्सी पनि कम भने थिएन ।
कार्यक्रमको अन्तमा लोकदोहोरी प्रतिष्ठान नेपालद्वारा प्रतिष्ठानका सचिव खुमन अधिकारी, गायिका प्रिति आले र गायक नर बहादुर रानाले स्याङ्जा परिवार दक्षिण कोरियाले स्याङ्जाको वालिङ्मा सम्पन्न साधारण सभामा आर्थिक सहयोग गरि पुर्याएको महत्वपूर्ण योगदानको कदर गर्दै केन्द्रिय अध्यक्ष युवराज गुरुङ लगायत कार्यसमितिलाई प्रशंसा पत्र प्रदान गरेको थियो भने आयोजकको तर्फबाट आमन्त्रित कलाकारहरुलाई मायाको चिनो, प्रमाणपत्र र दोसल्लाले सम्मान गरेको थियो । साथै कार्यक्रमका सभापति जीवलाल काफ्लेले उपस्थित सम्पूर्ण दर्शक,सम्पूर्ण सहयोगी संघसंस्था एवं व्यक्तित्वहरु लगायत आमन्त्रित र स्थानीय कलाकारहरुलाई धन्यवाद मन्तव्य राख्दै कार्यक्रमको समापन भएको घोषणा गरेका थिए । कार्यक्रमको पहिलो चरणको औपचारिक कार्यक्रम शाखा सचिव सन्तोष पोखरेलले र दोश्रो चरणको साँस्कृतिक कार्यक्रम कुशल प्रस्तोता किसान गुरुङले सञ्चालन गरेका थिए ।
