इपीएस मार्फत कोरिया आएका नेपाली करिब ६० हजार पुगे, पास भएका ९ हजार भन्दा बढी आउनै पाएनन्
रोजगार अनुमति प्रणाली (ईपीएस) को भाषा परीक्षामा उत्तीर्ण भएका करिब ७० हजार मध्ये झन्डै ६० हजार नेपाली कोरिया आइपुगेका छन् भने ९ भन्दा बढी नेपाली कोरिया आउन पाएनन् । वैदेशिक रोजगार विभाग ईपीएस कोरिया शाखाका अनुसार अहिलेसम्म ६९ हजार ९८ जना भाषा परीक्षा उत्तीर्ण भएकामा ५९ हजार ६ सय ९८ मात्र कोरिया आउन पाए । ९ हजार ४ सय नेपाली भने भाषा पास भएपनि कोरिया आउन पाएनन् ।
कोरियाले कामदार ल्याउन हरेक वर्ष नेपाल लगायत विभिन्न देशमा भाषा परीक्षा लिने गरेको छ । नेपालबाट हालसम्म छुट्याएको कोटाअनुसार कामदार नलिएको तथ्यांकले देखाउछ । २००८ मा ६ हजार ७ सय ८६ कामदारको कोटा छुट्याएको थियो । सुरुको वर्ष ८१ महिलासहित २ हजार ८ सय १४ जना कामदार कोरिया आएका थियो । दोस्रो वर्ष भाषा परीक्षा गरेन । पहिलो वर्ष नै पास भएको मध्येबाट थप १९ सय ६१ जना आउन पाए ।
२०१० का लागि ४ हजार एक सय ८० पास भए । त्यस वर्ष दुई हजार तीन सय ३९ जना मात्रै आउन पाए । सन् २०११ मा १५ हजार ६ सय ७८ उत्तीर्ण भएकामध्येबाट ३ हजार ९ सय ८३ जना मात्रै कोरिया आए । २०१२ मा परीक्षा भएन । अघिल्लो वर्ष उत्तीर्ण भएकामध्येबाट ६ हजार तीन सय ३२ जनाले मात्रै मौका पाए ।
सन् २०१३ मा ७ हजार ७ सय ७८ जना पास भएकामध्ये ५ हजार ४६ जना मात्रै आउन पाए । सन् २०१४ मा तीन हजार ४ सय ७८ जना पास भएकामा ६ हजार २८ जना र २०१५ मा ८ हजार ३ सय ७० जना पास भएकामा ५ हजार ८ सय ६६ ले अवसर पाए ।
पछिल्ला तीन वर्षहरूमा पनि पास भएका सबै आउन पाएनन् । २०१६ मा ८ हजार ७९, २०१७ मा ७ हजार ८ सय र २०१८ मा ८ हजार ५ सय १ जना कोरिया आउन पाएका छन् ।
यस वर्षको भाषा परीक्षाका लागि शुक्रबारदेखि फाराम भर्ने समय खुलेको छ । १८ देखि ३९ वर्षभित्रकाले कोरिया जान फाराम भर्न पाउँछन् । २०१९ का लागि कोरियाले १० हजार ५० नेपालीको कोटा छुट्याएको छ ।
कोरियाले सन् २००८ देखि नेपाली कामदारलाई कृषि र उत्पादन क्षेत्रमा ल्याउन थालेको हो ।
