मुस्लिम विरोधीहरुकै अगाडि हाँसेर फोटो खिचाएपछि महिला बनिन् भाइरल
गत आइतबार अमेरिकाको वासिङ्टनस्थित एक इस्लामिक सम्मेलनमा सहभागी हुन जाँदै गर्दा २४ वर्षीया साएमा इजमाइल मुसल्मान विरोधी बोर्ड समाएर उभिरहेका आक्रोशित प्रदर्शनकारीहरुका अगाडि पुगिन् । उनी र उनका साथी सो बाटो हिँड्दै गर्दा ती विरोधीहरुले उनीहरु नर्कमा जानेछन् भनि कराउँदै विरोध जनाइरहेका थिए । तर यसको प्रतिक्रियामा साएमाले उनीहरुकै अगाडि शान्तिको चिन्ह देखाएर हाँस्दै फोटो खिचाइन् जसबारे अहिले सामाजिक संजालमा व्यापक चर्चा भइरहेको छ भने इन्स्टाग्राममा हजारौँ मानिसहरु साएमाको समर्थनमा उत्रिरहेका छन् ।
सो अवस्थामा प्रदर्शनकारीहरुले पक्कै पनि साएमाबाट आक्रामक प्रतिक्रिया अपेक्षा गरेका थिए तर उनको विपरित व्यवहारले उनीहरु आश्चर्यमा परेका हुन् । उनी भन्छिन्, “म उनीहरुलाई आफ्नो हाँसो देखाउन चाहान्थेँ र मुसल्मान महिला भएकामा म कति खुसी छु भनेर जताउन र तिनकै सामु शिर उठाएर हिँड्न चाहान्थेँ ।”
यसरी उनीहरुको अपहेलना र घृणाका बावजुद आफूहरु सधैँ दयालु र आफ्नो धर्मप्रति समर्पित रहने अनि कट्टरताको सामना गर्न प्रेम फैलाउन पनि नछाड्ने उनले बताएकी हुन् । तर सामाजिक सञ्जालमा उनीबारे भइरहेको चर्चाप्रति उनका परिवारले भने अधिक चिन्ता व्यक्त गरिरहेको उनी बताउँछिन् । तापनि अहिलेसम्म आफूले कुनै धम्कीपूर्ण सन्दैश प्राप्त नगरेको उनको भनाइ छ ।
साएमाका अनुसार उनी लगायत हिजाब लगाउने अन्य थुप्रै मुसल्मान बस्ने क्षेत्र पछिल्लो समय असुरक्षित बन्दै गइरहेको छ र कतिपय अवस्थामा उनीहरु उत्पीडनको शिकार समेत हुनु परेको उनी बताउँछिन् ।
उनी सहभागी हुन गइरहेको सम्मेलन भने उत्तर अमेरिकामा इस्लाम धर्मको प्रचार गर्नका निम्ति आयोजित गरिएको थियो र त्यसमा उपस्थित हुन जाँदा ती प्रदर्शनकारीहरलाई दैनिक देख्ने गरेपनि उनले बेवास्ता गरी हिँड्ने गरेकी थिइन् । तरपनि उनले मनमनै तिनका बारेमा सोचिरहने गरेको बताइन् । यस्तोमा अर्को दिनपनि तिनीहरुलाई त्यसैगरी देख्न पाउँदा आफूलाई खुसी महसुस भएको र आफ्नो खुसी उनीहरुलाई देखाउन चाहेको उनी बताउँछिन् । उनले थप भनिन्, “उनीहरुले बाहिर विरोध गर्नुको सट्टा भित्रको सम्मेलनमा फैलिरहेको प्रेमलाई सुने हुन्थ्यो जस्तो मलाई लाग्छ ।”
उनले यसअघि २०१७ मा पनि मुसल्मान विरुद्ध प्रदर्शन गर्नेहरुका अगाडि तस्बिर खिचाएकी थिइन् । यसरी अबका नयाँ मुसल्मान पीढीहरुले सबैको हेलाका बावजुद आफ्नो धर्मलाई प्रेम गर्न नछाडुन् भन्ने आफ्नो चाहना रहेको उनी बताउँछिन् ।
