कोरियन भन्दा बिदेशी कामदारको कार्य क्षमता कम, तलब घटाउन माग

कोरियाको साना तथा मझौला कम्पनिहरुको संगठनले गरेको यो बर्षको प्रारम्भिक सर्बेक्षण अनुसार कोरियन कामदारको तुलनामा बिदेशी कामदारहरुको औसत कार्यक्षमता ८७.५ प्रतिशत मात्र रहेको जनाएको छ । जस अनुसार E-9 भिसामा आएका विदेशी कामदारको कार्यक्षमता कोरियनको तुलनामा १२ दशमलव ५ प्रतिशतले कम हुन आउँछ ।

यसरी उत्पादन क्षमता कम हुनुको मुख्य कारण विदेशी कामदारमा रहेको भाषिक कमजोरीलाई लिएको छ । यसै तथ्यलाई आधार मान्दै यहाँका साना कम्पनीहरुले बिदेशी कामदारको न्युनतम ज्याला घटाउन माग गरेका छन् ।

आगामी वर्षको ज्याला निर्धारण गर्न आइतबार ख्वाङ्जुमा भएको सार्वजनिक सुनवाइ कार्यक्रममा साना कम्पनीहरुको प्रतिनिधिले उक्त माग राखेको कोरिया टाइम्सले जनाएको छ । प्रतिनिधिले भनेका छन् “पछिल्लो दुई बर्षमा न्युनतम ज्याला बढ्दा धेरै व्यवसाय बन्द भैसकेको छ । त्यसैले विदेशी कामदारका लागि अलग ज्याला प्रणाली लागू गरेर साना कम्पनीलाई सरकारले सहयोग गर्नुपर्छ ।”

तर कोरियान सरकारको विभेद बिरुद्धको कानुनले गर्दा अहिले नै फरक ज्याला प्रणाली लागु गर्न नसकिने श्रम मन्त्रालयले जनाएको छ ।

पछिल्लो २ बर्षमा मून जे-इन सरकारले न्युनतम ज्याला बढाउने र न्युनतम काम गर्ने समय(घन्टा) घटाउने निति अवलम्बन गरेको छ । राष्ट्रपति मूनको चुनावी नारा नै २०२० सम्ममा न्युनतम ज्याला १० हजार वन पुर्याउने थियो ।

यसै प्रतिबद्धता अनुरुप राष्ट्रपतिमा निर्वाचित भएपछि सन् २०१८ मा एकैचोटि १६.४ प्रतिशतले ज्याला बढाएर प्रतिघन्टा ७ हजार ५ सय ३० वन पुर्याएका थिए । त्यस्तै सन् २०१९ मा १०.९ प्रतिशतले बढाएर ८ हजार ३ सय ५० कायम गरिएको छ ।