गुठी बिधेयक प्रति नेवाः पुचः दक्षिण कोरियाको बिरोध, फिर्ता गर्न माग
भूमि सुधार मन्त्रालयद्धारा गत हप्ता संसदमा दर्ता गरेको गुठी बिधेयक प्रति नेवाः पुचः, दक्षिण कोरियाले बिरोध जनाएको छ । नेवाः पुचः ले शुक्रबार प्रेस विज्ञप्ति मार्फत आफ्नो विरोध जनाएको हो ।
मौलिक परम्परा, संस्कृति र इतिहास नै राज्यको अमुल्य सम्पत्ति र पहिचान हो । तर संस्कृतिलाई जगेर्णा र संरक्षण गर्नुको साटो उल्टै मास्ने काममा राज्य नै उद्दत रहेको भन्दै विज्ञप्तिमा लेखिएको छ “भूमि सुधार मन्त्रालय मार्फत संसदमा दर्ता गरेको गुठी विधेयकको नेवाः पुचः, द. कोरिया घोर बिरोध गर्दछ । साथै उक्त विधेयक अविलम्ब फिर्ता गर्नका लागि जोडदार माग गर्दछ ।”
विज्ञप्ति
भूमि सुधार मन्त्रालयद्धारा गत हप्ता संसदमा दर्ता गरेको गुठी बिधेयक प्रति नेवाः पुचः, दक्षिण कोरिया घोर बिरोध गर्दछौं । हाम्रो मौलिक परम्परा, संस्कृति र इतिहास नै राज्यको अमुल्य सम्पत्ति र पहिचान हो । संस्कृतिलाई जगेर्णा र संरक्षण गर्नुको साटो उल्टै मास्ने काम तर्फ राज्य नै उद्दत रहेको हुंदा यो एउटा उपत्यकावासी नेवार समुदायसंग मात्र जोडिएको र सिमित रहेको बिषय नभई सिङ्गै मुलुक र आम नागरिकको मौलिक पहिचान पनि हो ।
गुठी परम्परा सम्भवतः एउटा यस्तो विशिष्ट संस्कृति हो, जसबाट विश्वमा नेपालको मौलिक पहिचान बनेको छ । नेपालको लिखित इतिहास जत्ति कै प्राचीन गुठी कै कारण हाम्रा संस्कृति, संगीत, परम्पराले निरन्तरता पाउंदै आईरहेका हुन् । कति शासन व्यवस्था फेरिए, कति शासक ढले र उदाए, कतिपय सन्दर्भमा नेपाल कै सिमाना विस्तार र संकुचनसम्म भयो, तर गुठी नेपाली सामाजिक जीवनबाट कहिल्यै अलग्गिएन । राज्य सत्ताले बुझोस् एकातिर राज्यको प्रतिनिधिका हैसियतमा राष्ट्रपतिले भोटोजात्रामा औपचारिक उपस्थिति जनाउनु, अर्कातिर सम्पदा–संस्कृतिको जरै निमोठ्ने कानुनी प्रावधान खोज्नु, यो त केवल पाखण्ड हो । यस्तो प्रवृत्तिले संस्कृति–सम्पदाको संरक्षण कदापि हुंदैन । यस खाले पाखण्डको कुनै अर्थ छैन । यसर्थ भूमि सुधार मन्त्रालय मार्फत संसदमा दर्ता गरेको गुठी विधेयकको नेवाः पुचः, द. कोरिया घोर बिरोध गर्दछ साथै उक्त विधेयक अविलम्ब फिर्ता गर्नका लागि जोडदार माग गर्दछ ।
