चुम्लुङ कोरियाद्वारा चासोक तङनाम मनाउने तैयारी पूरा
किरात याक्थुङ चुम्लुङ दक्षिण कोरियाले लिम्बू जातिको महान चाड चासोक तङनाम मौलिक परम्परा अनुसार भब्य रुपले मनाउने भएको छ। उक्त तङनाम विषेश कार्यक्रम यहिँ डिसेम्बर १५ तारिखको दिन दोङ्देमुन स्थित सङ्बोक खुछङमा मनाउने तैयारी भइसकेको आयोजकले जनाएको छ।
कार्यक्रममा लिम्बू जातिको मौलिक केलाङ (च्याब्रुङ नाच) यालाङ (धान नाच) सँगै नेपालबाट आमन्त्रण गरिएका कलाकारहरुको हाक्पारे, ख्याली पालाम सहितको बेजोड सांगीतिक प्रस्तुति हुनेछ। तङनाममा लिम्बू गायक डिल्ली फोम्बो र यादन सेर्मालाई आमन्त्रण गरिएको छ। यसैगरी कोरियामै रहेका कलाकार जोन तुम्बापो, अप्सन लिम्बू, सुदिप सेर्मा र युगल किशोर शेर्माले समेत आफ्ना प्रस्तुति राख्नेछन्। नाचगान बाहेक लिम्बू जातिको परम्परागत परिकारहरु समेतको स्वाद लिन सकिने आयोजकले जनाएको छ।
लिम्बू जातिले प्रत्येक वर्ष मंसिर पूर्णिमाको दिन मनाउने चासोकमा नयाँ पाकेको अन्नबालीलाई चासोक सेवा/न्वागी पूजा गरि सर्वशक्तिमान शृष्टिकर्ता तागेरानिङ्वाभुमाङ र पितृलाई चढाएर मात्र ग्रहण गरिने परम्परा रहेको छ। यसो गर्नाले रोगब्याधी नलाग्ने, सह बस्ने विश्वास गरिन्छ।
कोरियामा रहेका संस्थाहरुमा पत्र नपुगेको खण्डमा यो समाचारलाई नै आधार मानेर कार्यक्रममा उपस्थिति जनाइदिन आयोजकले अनुरोध गरेको छ। कार्यक्रममा जाने तरिका ट्रेन लाइन नं.४,सङ्सिन् यदे स्टेसनको ३ नं.गेटबाट थोरै अगाडी सङ्बोक खुछङ बिल्डिंगको ४ तला रहेको छ।
गतवर्ष चुम्लुङ कोरियाले गायक एकदेव लिम्बू, तिर्सना नेम्बाङ, इन्द्र सुशील चोङ्बाङ र गंगा फियाक लिम्बूको साथमा चासोक तङनाम मनाएको थियो।
