तमू धीं दक्षिण कोरियाले मनाउने “तमू च्यु-ल्होसार २०७६” को पोष्टर सार्वजनिक ।
“प्ये म्हस्याँ छ्या म्हमु, छ्या म्हस्याँ छ्या ल्हु म्हमु, ल्हु म्हस्याँ म्हि म्हमु” अर्थात् “शास्त्र हराए, संस्कार हराउँछ, संस्कार हराए संस्कृति हराउँछ, संस्कृति हराए मान्छे (जाति) नै हराउँछ ।”
प्रवासी भूमि दक्षिण कोरियामा छरिएर रहेका तमू (गुरुङ) जातिको आफ्नो मौलिक पहिचान, भेषभूषा-भाषा, संस्कार-सँस्कृति तथा परम्परालाई बचाई राख्न र जगेर्ना गर्ने महत्वपूर्ण उद्वेश्य सहित तमू धीं दक्षिण कोरियाले विगतमा झैं यो वर्ष पनि फो-ल्हो (मृग वर्ग) लाई विदाई गर्दै च्यु-ल्हो (मुसा वर्ग) लाई स्वागत गरि दिवा भोज, शुभकामना आदानप्रदान तथा विविध साँस्कृतिक कार्यक्रमको पोष्टर सार्वजनिक गरेको छ ।
अंग्रेजी नयाँ वर्षको जनवरी महिनाको पहिलो आइतबार ल्होसार मनाउँदै आएको परम्परा अनुसार यो पटक पनि २०२० जनवरी ०५ तारिक आइतबारका दिन सउल स्थितको सुविधा सम्पन्न हल Hotel Skypark Kingston Dongdaemun मा मनाउने भएको हो । यो तमू ल्होसार केन्द्रीय समितिको आयोजना र संस्थाका थेगु शाखा र ख्यङ्साङ्नाम्दो शाखाको संयुक्त सह-आयोजनामा एकै थलोमा कार्यक्रम आयोजना गरिने भएको छ ।
तमू धींले यसपटकको कार्यक्रममा नेपालबाट चर्चित राष्ट्रिय कलाकार ल्याउने भएको छ । जसमा गीत रचनाकार, संगीतकार, नायक र आफैंमा कुशल गायक मनोज गुरुङ र नेपाली लोक तथा दोहोरी क्षेत्रमा अत्यन्तै चर्चित गायिका इन्द्रा गुरुङ आउने भएका हुन् । २०६५ सालमा लेखनाथ महोत्सवमा आयोजित पहिलो गण्डकी ताराको उपाधी चुमिसकेका गायक मनोज गुरुङले नेपाली, गुरुङ र अन्य भाषामा समेत ३ समेत दर्जन भन्दा बढि गीतमा आफ्नो सुमधुर स्वर भरिसकेका छन् भने गायिका इन्द्रा गुरुङले विशेषत: गाउँपाखामा गुञ्जने मौलिकपन बोकेको एक दर्जन बढि गीतहरु दर्शकश्रोता माझ ल्याई वाहवाही कमाईसकेकी छिन् । अत: उहाँहरुको आगमन र गायन प्रस्तुतिले कोरिया पुरै ल्होसारमय बन्नेमा आयोजक ढुक्क छ ।
साथै उक्त दिन वर्ग (ल्हो) जाने र आउने तमू व्यक्तिहरुलाई मौलिक परम्परा अनुसार रुपा लगाई स्याई-स्याई गरिने र तमू (गुरुङ)को मौलिक बाजागाजा सहित छैंडु नाच, गुरुङ समुदायको लोपोन्मुख मारुनी नृत्य, कौरा नृत्य, स्थानीय कलाकारहरुको बेजोड साँस्कृतिक प्रस्तुति, हाँस्य प्रहशन र रमाईलो जमघट सँगै स्वादिष्ट नेपाली थुप्रै खानाको परिकारको व्यवस्था रहने आयोजकले जनाएको छ ।
कोरियामा रहेका सम्पूर्ण तमू (गुरुङ) एवं गैर तमू (गुरुङ) दाजुभाइ तथा दिदीबहिनीहरु, सबै संघ-संस्थाहरु, बुद्धिजीबीहरु, पत्रकारहरु, व्यवसायीहरुलाई हार्दिक निमन्त्रणा सहित सो कार्यक्रममा उपस्थित जनाई “तमू (गुरुङ) च्यु-ल्होसार २०७६” कार्यक्रम सभ्य र भव्य सफल पारिदिनु हुन तमू धीं दक्षिण कोरियाले हार्दिक अनुरोध समेत गरेको छ ।
