कोरियामा १७ महिने वालक र उनका बाबुआमालाई १० दिन पछि पुनः कोरोना भाइरसको संक्रमण

दक्षिण कोरियामा १७ महिनाको वालक र उनका बाबुआमा कोरोना भाइरस संक्रमणबाट निको भएर घर फर्केको १० दिन पछि पुनः संक्रमित भएको दक्षिण कोरियाली रोग नियन्त्रण तथा रोगथाम केन्द्र(केसीडिसी)ले जनाएको छ । मंगलबार आइतबार १ सय २५ जना कोरोना भाइरसबाट संक्रमित भएका थिए ।
यो संगै झन्डै दुई हप्तासम्म सय भन्दा कम संक्रमित कायम रहेको कोरियामा विरामीको संख्या बढेको छ । मंगलबार बेलुकीसम्म ९ हजार ७ सय ८६ जना कोरोना भाइरसबाट संक्रमित भएका छन् भने ५ हजार ४ सय ८ जना स्वस्थ्य भएर घर फर्किका छन् । १ सय ६२ जनाको मृत्यू भएको केसीडिसीले जनाएको छ ।
पुनः संक्रमित दम्पतीलाई फरक फरक अस्पतालमा राखिएर उपाचार गरिएको थियो । दुबै जना निको भएर घर गएको केही समय पछि विरामी परेका थिए । कसरी पुनः कोरोना लाग्यो भन्ने बारेमा जाँच भैरहेको यहाँको स्वस्थ्य मन्त्रालयले जनाएको छ । उनीहरुलाई गत फेबु्रअरी महिनामा कोरोनाबाट अति प्रभावित थेगुमा बिहेभोजमा सहभागी भए पछि भाइरसबाट संक्रमित भएका थिए ।
विदेशबाट आउने सबै अनिवार्य क्वारान्टाइनमा बस्नु पर्ने
अन्य देशबाट कोरियामा आउने सबै यात्रुले अनिवार्य रुपमा १४ दिने क्वारान्टाइनमा बस्नु पर्ने भएको छ । केही सयम अघिसम्म चीन, युरोप र अमेरिकाबाट आएका यात्रुलाई मात्र क्वारान्टाइन बस्नु पर्ने नियम राखिएको थियो । कोरियामै रहेका भन्दा अन्य देशहरुबाट आउने यात्रुहरुमा बढि कोरोनाको संक्रमण देखिए पछि यस्तो नियम लागु गरिएको हो ।
कोरियामा बसोबासको व्यवस्था भएकोले आफ्नै घरमा क्वारान्टाइनमा बस्न पर्नेछ भने नभएकाहरुका लागि सरकारले बनाएका आइसोलेसन केन्द्रमा बस्न पर्नेछ । यसरी बस्दा दैनिक १ लाख वन अर्थात १० हजार रुपैया तिर्नु पर्नेछ ।