कोरियामा दुई महिना पछि नयाँ कोरोना संक्रमित विरामी न्युन

दक्षिण कोरियामा दुई महिना पछि पहिलो पटक कोरोना भाइरस (कोभिड १९)बाट संक्रमितको संख्या १० को हाराहरीमा झरेको छ । आइतबार नयाँ संक्रमितको संख्या ८ जना थियो भने सोमबार १३ जना छन् । शनिबार नयाँ संक्रमितको संख्या १८ थियो । झन्डै दुई हप्ता देखि संक्रमित विरामीको संख्या ५० जना भन्दा कम छ । कोरियाली सरुवा रोग नियन्त्रण तथा रोकथाम केन्द्र(केसीडिसी)ले आइतबार जनाए अनुसार ६१ दिन पछि पहिलो पटक नयाँ संक्रमितको संख्या १० भन्दा कम भएको हो ।
कोरियामा पहिलो पटक जनवरी २० मा कोरोना भाइरस संक्रमित भेटिएको थियो । फेबु्रअरी १८ सम्म थोरै संख्यामा कोरोना संक्रमित भेटिए पनि सोही महिनाको २९ तारिखमा एकै दिन सबै भन्दा बढि ९ सय ९ जना संक्रमित भएका थिए । धेरै विरामी सिन्चान्जी धार्मिक समूहका थिए । कोरियाली सरकारले सो धार्मिक समूहका २ लाख भन्दा बढि मानिसको कोरोना भाइसर परिक्षण गरिएको थियो । अहिलेसम्म ५ लाख ५० हजार १ सय ९ जनाको भाइरस परिक्षण गरिएको कोरियाली स्वस्थ्य मन्त्रालयले जनाएको छ । शुक्रबार ८ हजार जना शंकास्पद मानिसहरुको कोरोना भाइसर परिक्षण गरिएकोमा शनिबार संख्या घटेर ४ हजार जनाको मात्रै परिक्षण गरिएको थियो ।
अहिलेसम्म कोरियामा १० हजार ६ सय ६१ जना संक्रमित भएका छन् । जस मध्ये २ सय ३४ जनाको ज्यान गएको छ भने ८ हजार ४२ जनाको सफल उपचार भएको छ । १ सय ७९ जनालाई पुनः कोरोना भाइरसको संक्रमण देखिएको छ । कोरियामा कोरोेना संक्रमणबाट २.१९ प्रतिशत मृत्यूदर रहेको छ । ७० बर्ष भन्दा बढि उमेरका विरामीको मृत्यु दर ९.६५ छ भने ८० बर्ष भन्दा माथिका विरामीको मृत्युदर २३.२४ रहेको छ ।
कोरोनको संक्रमण घटे पनि यहाँको सरकारले कोरोनाबाट बच्नका लागि अझै पनि ठूला सभा समारोह गर्न दिएको छैन । सामाजिक दुरी कायम गर्ने नियम मे ५ सम्मका लागि बढाईको छ । विद्यालय, जिम, नाइट क्लव, चर्चहरुमा भेला हुन नदिने निर्णयलाई पनि निरन्तरता दिईको छ ।
गत बुधबार भएको आम निर्वाचनमा २ करोड ९० लाख भन्दा बढि मानिसले भाग लिए पछि कोरोना संक्रमितको संख्या पनि बढ्न सक्ने भन्दै सबै कोरियाली नागरिकलाई सचेत रहन सरकारले आग्रह गरेको थियो । तर पनि निर्वाचनमा सहभागी भएका कारण कोही पनि संक्रमित भएका छैनन् ।
कोरियामा अप्रिल ३० मा मनाउने बुद्ध जयन्ती र मे पहिलो हप्ता हुने वाल दिवसका कार्यक्रमलाई पनि रोक्न आग्रह गरेको छ । बुद्ध जयन्तिमा सोलमा विश्वका ३० भन्दा बढि देशका बौद्धमार्गीहरुको ठूलो पदयात्रा र कार्यक्रम हुने गर्दछ । ल्यान्टर्न फेस्टिवल भनेर मनाइने यो कार्यक्रम सोलको मुख्य शहर दोङदेमुन हिस्ट्रि एन्ड कल्चर पार्क, जोङगाग, जोगेशाको सडकहरुमा लाखौ मानिसले पैदल यात्रा गर्ने भएकोले कोरोना भाइरस सर्न सक्ने भएकोले समेत सरकारले कार्यक्रम रोक्न आग्रह गरेको हो ।