नेपालका विपन्न परिवारको लागि ‘न्यानो कम्बल’ अभियान

कोरियन १० हजार वन अर्थात झन्डै एक हजार रुपैया । यहाँ बस्ने नेपालीहरुले ६ बर्ष देखि जाडोको समयमा पैसा उठाएर नेपालका गाउँहरुमा न्यानो कम्बल बितरण गरिरहेका छन् । यस पटक पनि यो अभियान सुरु भएको छ ।
रोजगार अनुमति प्रणाली (ईपिएस) मार्फत कोरिया आएका युवाहरुले सुरू गरेकाे यो अभियानमा काेरियामा रहेका नेपाली सहभागी हुन्छन् ।
‘हामी यो अभियान विगतझै सेम्टेम्बर र अक्टोबर महिना भरि संचालन गर्छौ । गत बर्ष तीन सय भन्दा बढि साथीभाइले सहयोग गर्नु भएको थियो । यस पटक पनि त्यो भन्दा बढि हुन्छ भन्ने आशा लिएका छौं ।’ तीन बर्ष देखि मान वन अभियानको संयोजन गर्दै आएका सरोज केसीले भने । ‘हामीले बिपन्न परिवारका लागि एउटा ‘कम्बल’ मात्रै दिन सक्यो भने त्यो पनि ठूलै कुरा हो । पाँच बर्षमा पन्ध्र सय भन्दा बढि परिवारलाई कम्बल किनेर दिन सकेका छौं । यसैमा हामी खुशी छौं ।’ उनले थपे ।
मान–वन संकलन सेम्टेम्बर पहिलो हप्ता सुरु हुन्छ । कम्पनी कामले ब्यस्त समय भए पनि थोरै समय सामाजिक संजालमा खर्चिएर गरेर सहयोग उठाउने गरेको अभियानका अगुवा गुरुदत्त न्यौपाने भन्छन ‘बिभिन्न फेसबुक गु्रपमा मान–वन अभियानको पोस्टर राखेका छौं । एक दिनको खाजा खर्च कटाएर साथीहरुले सहयोग गरि रहनु भएको छ । सकारात्मक काम भएकोले होला शायद ।’ उनले भने ।
अभियान सुरु भएदेखि अहिलेसम्म १५ सय परिवारलाई कम्बल बितरण गरिसकेको छ । यो अभियानबाट सिन्धुपाल्चोक, सर्लाही, सप्तरी, धादिङ, दोलखा, मोरङ, सुनसरी, चितवन र कालिकोट जिल्लाका भित्री गाउँमा सहयोग प्रदान गरिएको छ ।
पुसको सुरुमा बितरण गरिदै आएको कम्बल वितरण यो पटक कहाँ गर्ने भन्ने अहिले निर्णय नभएको केसी बताउँछन् । ‘अभियानमा सहाभागी सबै जनाले निर्णय गर्छौ । अति आवश्यक परेकालाई सकेसम्म सहयोग गर्ने प्रयास हुन्छ ।’ उनले थपे ।