भर्चुअल जूम मार्फत तमू धीं कोरियाको तमू ल्वों ल्होसार कार्यक्रम सम्पन्न ।
सउल कोरिया ।०४ जनवरी २०२०
तमू जातिको नयाँ वर्ष तथा नेपाली मौलिक राष्ट्रिय महान् चाड ल्होसारको अवसरमा यस वर्ष ‘च्यू’ ल्हो’ (मूसा वर्ग) को विदाई तथा ‘ल्वों ल्हो’ (गाई वर्ग) स्वागत सहित भर्चुअल जूम मार्फत तमू धीं दक्षिण कोरियाले तमू ल्वों ल्होसार कार्यक्रम २०७७ सम्पन्न गरेको छ ।
तमू धीं कोरियाले बर्सेनी जनवरी महिनाको पहिलो आइटबार ल्होसार मनाउँदै आइरहेको परम्परा अनुसार वर्तमान कोभिड-१९ कोरोनाको विषम सन्त्रासको कारण जनवरी ३ तारिक आइटबारलाई मिति तय गरि भर्चुअल जूम मार्फत तमू ल्वों ल्होसार कार्यक्रम २०७७ शुभकामना आदान प्रदान गरि मनाएको हो ।
संस्थाका केन्द्रीय अध्यक्ष जीत गुरुङको सभापतित्वमा सम्पन्न सो कार्यक्रममा प्रमुख अतिथिको रुपमा संस्थाका संरक्षक भिम गुरुङ (पर्वत) रहनुभएको थियो । संस्थाका वरिष्ठ उपाध्यक्ष ईन्द्रराज गुरुङको स्वागत मन्तव्यसँगै शुरु भएको उक्त कार्यक्रम सउलस्थित दोङ्देमुनमा रहेको तमू धीं सेल्टरमा कार्यक्रमका सभापति, प्रमुख अतिथि, केन्द्रीय सल्लाहकार लीना गुरुङ, तमू धीं सेल्टर संयोजक नरेन्द्र गुरुङ लगायत केही अन्य संस्था सम्बद्ध व्यक्तित्वहरुको उपस्थितिका विच दीप प्रज्वलन गरि कार्यक्रमको औपचारिक समुद्घाटन गरिएको थियो । तमू संस्कार, मूल्य र मान्यता अनुसार सोही अवसरमा ल्हो जाने र ल्हो आउने आउनेलाई रुपा लगाई स्याईस्याई समेत गरिएको थियो ।
प्रविधिको उच्चतम प्रयोग गर्दै विविध साँस्कृतिक झलकहरु समेत प्रस्तुत गरिएको थियो । संस्थाका सल्लाहकारहरु, संस्था सम्बद्ध व्यक्तित्वहरुले हामीविचको सम्बन्ध, एकता र सद्भावमा अझ प्रगाढको शुभेच्छा व्यक्त गर्दै सामाजिक दूरी कायम र सबैलाई महामारी कोरोनाबाट सुरक्षित रहन आग्रह गर्नुभएको थियो । आफ्नो जाति र संस्थाको मूल मर्म र भावानालाई सदैव केन्द्रमा राखेर आफ्नोपन र अपनत्व हामी सबैमा हुनुपर्ने धारणा र तर्क राख्दै मन्तव्य मार्फत शुभकामना व्यक्त गर्नुभएको थियो । भर्चुअल जूमका लागि संस्थाका अग्रज व्यक्तित्व विजय गुरुङ, केन्द्रीय सदस्य दुर्गा गुरुङ र वरिष्ठ उपाध्यक्ष ईन्द्रराज गुरुङको विशेष प्राविधिक सहजीकरण सँगै कार्यक्रम सञ्चालन केन्द्रीय महासचिव लेसन गुरुङले गरेका थिए ।
प्रवासको भूमिमा रहेर आफ्नो जातिको मौलिक परम्परा, भेषभूषा, संस्कार र संस्कृतिको जगेर्नाको निम्ति अग्रसर रहि आएको सन्दर्भमा आफ्नो क्रियाशिलतालाई अझ जिम्मेवार र जीवन्त प्रदान गर्न महामारी कोभिड १९ को जोखिमलाई ख्याल गर्दै भर्चुअल जूममा सहभागी जनाउनुहुने तमाम संस्था सम्बद्ध महानुभावहरु र शुभचिन्तकहरुलाई तमू धीं दक्षिण कोरियाले हार्दिक धन्यवाद व्यक्त गरेको छ ।
