मस्तिष्क पक्षघात बिरामी गुरुङको स्वास्थ्यमा क्रमिक सुधार, थाना गुम्बा सउलबाट बीस लाख कोरियन वोन थप सहयोग
बोम्जन गुरुङ, सउल कोरिया
१२ फेब्रुअरी २०२१
मस्तिष्क पक्षघात जस्तो जटिल रोगको कारण दक्षिण कोरियाको थाङ्जिन छोङ्हाप अस्पतालमा उपचारार्थ निर्मल गुरुङलाई थाना गुम्बाबाट बीस लाख कोरियन वोन थप आर्थिक सहयोग जुटेको छ । नेपाली सेकुवा कर्नरका सञ्चालिका एवं वोमन फर वोमनका कोषाध्यक्ष पार्वती मोक्तानको विशेष सहकार्यमा जुटेको उक्त रकम तमू धीं दक्षिण कोरिया केन्द्रीय अध्यक्ष जीत गुरुङ, सहकोषाध्यक्ष नरेन्द्र गुरुङ र स्वयं पार्वती मोक्तान गुम्बामा उपस्थित भई सो सहयोग रकम गुम्बाका लामा प्रमुख (다나 단경 스님) को हातबाट बुझेका हुन् ।
कास्की परिवार दक्षिण कोरिया र तमू धीं दक्षिण कोरियाको संयुक्त पहलमा एनआरएनए कोरिया र एमटियूको कानुनी सहयोगमा कास्की परिवार दक्षिण कोरियाका संरक्षक तथा तमू धीं दक्षिण कोरियाका केन्द्रीय सल्लाहकार खोम प्रसाद गुरुङको संयोजकत्वमा बनेको “निर्मल गुरूङ बचाऔं अभियान” मा हालसम्म कूल २,४०,११,९८१ (अक्षरुपी दुई करोड, चालीस लाख, एघार हजार, नौ सय एकासी वोन) संकलन भएको छ । गत आइतबार सउलमा बसेको अभियान समितिको बैठकले संकलित रकम रुजु गर्दै सहयोगीहरुको सम्पूर्ण विवरण सार्वजनिक गरेको थियो ।
कास्की जिल्लाको पोखरा महानगरपालिका वडा नं. २७ स्थायी घर भई रोजगारीको शिलशिलामा कोरिया आएका गुरुङ अवैधानिक कामदार रहेकोले बीमा रकमबाट बञ्चित भएको कारण उपचार खर्च महँगो पर्ने भएको हो । अस्पताल श्रोतको पछिल्लो जानकारी अनुसार बिरामीको स्वास्थ्यमा क्रमिक सुधार आईरहेको जनाएको छ । बिरामी निर्मल गुरुङको जीवन बचाउन आर्थिक, नैतिक र भौतिक रुपमा सहयोग सहकार्य गर्नुहुने विभिन्न संघसंस्था, सामाजिक अभियान्ताहरु र अन्य सबैमा कास्की परिवार दक्षिण कोरिया र तमू धीं दक्षिण कोरियाले हार्दिक धन्यवाद व्यक्त गरेको छ ।
