तामाङ पर्वतीय पर्यटन व्यवसायीहरुको भेला सम्पन्न

काठमाडौं । पर्वतीय पर्यटनलाई पेशा बनाएका तामाङ पर्यटन ब्यवसायीहरुको भेला सम्पन्न भएको छ । शुक्रबार (चैत्र ६) स्वयम्भू बिजेश्वरीस्थित तामाङ कुदापमा उक्त भेला सम्पन्न भएको हो ।

तामाङ रिमठिम नामक संस्थाको आयोजनामा भएको भेलामा उनीहरुले आफ्नो पेशागत हकहित र संरक्षणका लागि के कस्तो सहकार्य गर्न सकिन्छ भन्ने बिषयमा अन्तरक्रियात्मक छल्फल गरेको थियो । साथै सामुहिक हितका कार्यहरुमा अझै सशक्तरुपमा एकढिक्का भएर अगाडी बढ्न सबैले प्रतिबद्धता जनाए ।

`तामाङ टुरिजम नेटवर्क´ का संस्थापक सदस्य नरध्वज तामाङ `क्षितिज´का अनुसार तामाङ समुदायको निकै ठुलो सङ्ख्या यो पेशामा आबद्ध रहँदै आएका छन् । ‘आधिकारिक तथ्याङ्क थपघट होला तर करिब १८०-२०० को सङ्ख्यामा तामाङ ब्यवसायीहरु यो क्षेत्रमा आवद्ध रहेको छ ।’ तामाङले बताए । नेपालको पदयात्रा पर्यटनमा शुरूवाती र योगदानको हिसाबले तामाङ समुदाय शेर्पापछिको दोस्रो स्थानमा रहेको उनको दाबी छ ।

भेलामा टानको बर्तमान महासचिव सरिता लामा, Dancing with the Star बिजेता सुमि मोक्तान, एन एम ए को अध्यक्ष शन्तबिर तामाङ लगायत अन्य धेरै अग्रज र पछिल्लो पुस्ताका ब्यवसायीको उपस्तिथि थियो । कार्यक्रममा सबैभन्दा पहिलोचोटि कम उमेरमा सगरमाथा आरोहण गरि बिश्व रेकर्ड कायम राख्न सफल कीर्तिमानी आरोही शम्भु तामाङको समेत सहभागीता रहेको थियो ।