आफ्नो जिल्लाको कोरोना आहतमा राहत बन्दै स्याङ्जा परिवार

बोम्जन गुरुङ, सउल कोरिया
१९ जून २०२१

कोरियामा अति क्रियाशिल संस्था स्याङ्जा परिवारले कोभिड-१९ यो विषम परिस्थितिमा आफ्नो गृह जिल्लाका एघार वटै पालिकाहरुलाई कोरोना रोकथाम र न्यूनीकरणका लागि आवश्यक स्वास्थ्य सामाग्री प्रदान गरेको छ । स्याङ्जा परिवार दक्षिण कोरियाको पहलमा संकलित रकम करिब पौने पाँच लाख रुपैंया बराबरको स्वास्थ्य सामाग्री सबै स्थानीय तहका प्रमुख र प्रतिनिधिहरु समक्ष यहि जून १९ तारिक जिल्लाका विभिन्न ठाउँमा हस्तान्तरण गरिएको हो ।

स्याङ्जा जिल्ला भित्रको कोरोनाको रोकथाम र विपत व्यवस्थापनमा सघाउ पुर्याउने उद्धेश्यले सञ्चालित आर्थिक संकलन अभियान सम्पन्न पछि जिल्लाका ५ नगरपालिका र ६ गाउँपालिकाहरुको प्रमुखहरु र स्याङ्जा सहयोग समाज अन्तर्राष्ट्रिय समन्वय समितिका अध्यक्ष जीवन न्यौपानेलाई गत ०६ जूनमा जूम भर्चुअल मार्फत विशेष अतिथि र वक्ताको रुपमा आमन्त्रण गर्दै स्याङ्जा परिवारको आयोजनामा वर्तमान कोभिड-१९ को प्रभाव र यसको न्यूनीकरण विषयक अन्तर्क्रिया कार्यक्रम सम्पन्न भएको थियो । उक्त कार्यक्रममा पालिका प्रमुख/वक्ताहरुले जनजीवनमा पारेको प्रभावबारे बोल्दै कोभिड १९ को वर्तमान अवस्था, रोकथामका उपाय, उपलब्ध श्रोत साधन र प्रयासहरु, सम्भावित समस्या र चुनौतीहरुबारे स्पष्ट रुपमा आ-आफ्नो धारणा राखेका थिए ।

संस्थासँग समन्वय गर्दै सामान खरीद सम्बन्धी सम्पूर्ण तारताम्य डिल्लु बिरकट्टा मगरले मिलाएका थिए भने संस्थाको प्रतिनिधित्व गर्दै भूपू अध्यक्ष तथा निवर्तमान वरिष्ठ सल्लाहकार धर्म गुरुङ, भूपू सहकोषाध्यक्ष प्रकाश भट्टराई, भूपू सदस्यहरु डिल्लु बिरकट्टा मगर, सितल राना, बिष्णु प्रसाद न्यौपाने, युगचन्द्र भट्टराई, स्याङ्जा सहयोग समाज अन्तर्राष्ट्रिय समन्वय समितिका प्रतिनिधिको उपस्थितिमा स्वास्थ्य सामाग्री वितरण गरिएको थियो ।

सहयोग गरिएका सामाग्रीहरुको विवरण यसप्रकार छन् ।

* पुतलीबजार नगरपालिका – अक्सिजन सिलिण्डर २ थान
* भीरकोट नगरपालिका – अक्सिजन सिलिण्डर २ थान
* वालिङ नगरपालिका – अक्सिजन सिलिण्डर २ थान
* गल्याङ नगरपालिका – वेड २ थान
* चापाकोट नगरपालिका – अक्सिजन सिलिण्डर- १ Nथान, पल्स अक्समिटर, माक्स र सेनिटाईजर
* बिरुवा गाउँपालिका -वेड २ थान
* फेदीखोला गाउँपालिका – अक्सिजन सिलिण्डर २ थान
* आँधीखोला गाउँपालिका – अक्सिजन सिलिण्डर २ थान
* हरिनाश गाउँपालिका – अक्सिजन सिलिण्डर २ थान
* अर्जुनचौपारी गाउँपालिका – अक्सिजन सिलिण्डर २ थान
* कालिगण्डकी गाउँपालिका – वेड २ थान

यस अघि स्याङ्जा जिल्लाभित्र दुईवटा एम्बुलेन्स भ्यानसहित एक्स-रे मेसिन, विभिन्न अस्पताललाई स्वास्थ्य सामाग्री प्रदान गरेर संस्थाले सूवर्ण इतिहास रचेको केन्द्रीय सचिव माधव अर्यालले बताए । हरेक दुःखद घटना र सबै खाले प्राकृतिक विपत्तिहरुमा समेत राहत वितरण गर्दै आइरहेको सन्दर्भ संस्थाका केन्द्रीय वरिष्ठ उपाध्यक्ष बिपना गुरुङले थपे । कोरियामा मात्र नभएर विशेषत: कोरियामा रहेका स्याङ्जाली र आफ्नो गृह जिल्लाको हरेक दुःख सुखमा संस्था सदैव कटिबद्ध रहेको स्याङ्जा परिवार दक्षिण कोरियाका केन्द्रीय अध्यक्ष श्री विजय थापाले बताए । कोरोनाको यो विषम कहर र मानवीय संकटमा मातृभूमिप्रतिको माया दर्शाउँदै आर्थिक संकलन देखि वितरण अभियानमा जुट्नुहुने तमाम मनकारी व्यक्तित्वहरुलाई स्याङ्जा परिवार दक्षिण कोरियाले हार्दिक धन्यवाद व्यक्त गरेको छ ।