हामी जान्दछौँ (कविता)

सामधान होइन, जान्नु मात्र समस्याको

जान्दछौँ हामी-
भूत बर्तमान भविष्य-आत्मा परमात्मा
ग्रह र उपग्रहहरु जान्दछौँ
धर्तीको उचाइ समुन्द्रको गहिराइ
कोठामा सुतिरहेको पलङदेखि चन्द्रमा सम्मको दूरी जान्दछौँ।

दिनानुदिन सेता हिउँहरु पग्लेर
कालो पत्थरमा रुपान्तरण हुन्छ हिमाल
हजारौँ शुन्दर टापुहरु कैयौँ सहरहरु
समुन्द्रमा बिलिन हुन्छन्
वायु मण्डलको वोजन तह पातलिदैँ जानुले
हजारौ जलचर थलचर बनस्पतिहरु
लोप हुँदै जानूको रहस्य
नदिले आफ्नै बाटो भुलेर गाउँ सहर पस्नु
कारणको कारण जान्दछौँ
जान्दैनौ हामी के मात्र?
जान्दछौँ हामी सबै सबै,

बारूदले महाशक्ति बनेको अमेरिका
“आरिराङ हो आरिराङ” प्रेमको गीत गाउने
कोरियन दाजुभाइको कटु सत्रुता
हिटलरको उदय र पतन
ग्यास च्यम्बरमा यहुदिहरुको नरसंहार
सबै सबै जान्दछौँ
जान्दैनौँ हामी के मात्र?

धर्मशास्त्रमा उल्लेखित चरम लैङ्गिक विभेद
कुवा इनारको चित्रहरुबाट
प्रस्ट हुन्छ असमान्ताको गहिरो खाडल
बदलापमा ज्युदै जलनु परेको छ मनवीफूलहरू
मल मुत्र अञ्जान विर्यसंग लतपतिएका छन्
निमुखा छोरीहरू
अदालतमा अड्किएर बस्छ फाइल
कारणको कारण जान्दछौं
जान्दैनौँ र हामी के मात्रै?
हामी जान्दछौँ सप्पै सप्पै,

जहा-
मानविय मुल्य, मान्यता, प्रेम, मानवता, संवेदनालाई कुल्चेर
लोभ, लालच, अहम,महत्वाकांक्षालाई उत्सव नमान्ने हो भने
बन्ने थिएन आजको कुरूप संसार
जस्तो की आज छ,

सामधान होइन जान्नु मात्र समस्याको ।

कवि इतर आवाज साहित्यका अभियान्ता हुन्।