स्वर्गीय पिताको सम्झनामा छोराहरुले गरे समाजलाई जिन्सी सहयोग ।
बोम्जन गुरुङ
०२ असोज २०७८
बुटवल उपमहानगरपालिका वडा नं. १७ मोतीपुर स्थित एक परिवारका चार दाजुभाई छोराहरुले स्वर्गीय पिता ह. ना. सु. तोक बहादुर गुरुङको स्मृति र वार्षिक पुण्य तिथिको अवसर पारेर आफ्नो समाजलाई एक थान त्रिपाल सहित दश थान प्लाष्टिक टेबल सहयोग गरेका छन् । स्वर्गीय गुरुङकी धर्मपत्नी खिममाया गुरुङ, छोराहरु ढाल बहादुर गुरुङ (मुख्या सुभा) टेक बहादुर गुरुङ, दिनेश गुरुङ (कोले), कमल गुरुङले एक अनौपचारिक कार्यक्रमका विच उक्त सामाग्रीहरु सामूहिक हस्तान्तरण गरेका हुन् ।
सो कार्यक्रमम गहौं भिर्कोट आँधिखोला तमु सेवा समाजका अध्यक्ष गौसरी गुरुङ, उपाध्यक्ष जितमाया गुरुङ, सहसचिव खिमा (बनु) गुरुङ, कोषाध्यक्ष धनमाया गुरुङ लगायत अन्य पदाधिकारी र सदस्यहरु, बाबा समूहका प्रतिनिधिहरु तथा समाजका अग्रज व्यक्तित्वहरु उपस्थित रहेका थिए । उक्त कार्यक्रममा ढाल बहादुर गुरुङ (मुख्या सुभा) ले हरेक सुख दुःखमा समाजसँगै रहने सौभाग्य मिलेकोमा खुशी व्यक्त गर्दै अझ दुःखको बेला समाजको साथ, सहयोग र सहकार्यको निमित्त हार्दिक आभार व्यक्त गरे । अरु माध्यमबाट समाजलाई सहयोग आउने गरेपनि पितृको सम्झना र पुण्य तिथिको अवसरमा यो सहयोग जुटेको पहिलो पटक भएको र आगामी दिनहरुमा समाजको हित, उन्नतिको लागि यस्तै सहयोग आउने अपेक्षा सहित अवधारणाको विकास भएको समाजको अध्यक्ष गौसरी गुरुङले बताईन् ।
स्वर्गीय गुरुङको परिवार मूलघर स्याङ्जा वालिङ-७, केवरे बनकट्टा घर भई बसाईसराईको सिलसिलामा करिब २५ वर्ष अघि मोतीपुर आएका थिए । स्व. गुरुङ भारतीय सेना निवृत अवकास प्राप्त थिए । उनी समाजका अभिभावक, सल्लाहकार साथै अति सक्रिय सामाजिक व्यक्तित्व थिए ।
