कास्की परिवार कोरियाको सातौं अधिवेशनबाट आरती ह्योल्मो नेतृत्वको कार्यसमिति चयन
बोम्जन गुरुङ
२० सेप्टेम्बर २०२१, सउल कोरिया ।
कास्की परिवार दक्षिण कोरियाको आसन्न सातौं अधिवेशन भर्चुअल जूम मार्फत सम्पन्न भएको छ । आइतबार प्रविण गिरीको सभापतित्व र गण्डकी प्रदेश सभा सदस्य सदस्य अर्थमन्त्री माननीय रामजी प्रसाद बरालको प्रमुख आतिथ्यतामा सो अधिवेधन सम्पन्न भएको हो ।
संस्थाको उपाध्यक्ष आरती ह्योल्मोको स्वागत मन्तव्यसँगै शुरु भएको उक्त अधिवेशनमा संस्थाका अध्यक्ष प्रविण गिरीले संस्थाको प्रगति प्रतिवेदन र सम्पूर्ण आर्थिक आयव्यय विवरण संस्थाका सहकोषाध्यक्ष सूर्यप्रसाद अधिकारीले प्रस्तुत गरेका थिए । “संगठित समूह नै परदेशको सहारा हो’ भन्ने संस्थाको मूल नारालाई अनुशरण गर्दै आईरहेको कास्की परिवारको सातौं अधिवेशनमा विशेष अतिथिहरुमा संस्थाका संरक्षक खोम प्रसाद गुरुङ, कास्की आदर्श समाज अन्तर्राष्ट्रिय समन्वय परिषद नेपालका अध्यक्ष गोविन्द पौडेल, नेपाली राजदूतावास दक्षिण कोरियाकी श्रम सहचारी रमा भट्टराई, कास्की जिल्लाका विभिन्न गाउँपालिका प्रमुखहरु गैर आवासीय नेपाली संघ राष्ट्रिय समन्वय परिषद दक्षिण कोरियाका निवर्तमान अध्यक्ष यज्ञराज सुवेदी, नेपाली सम्पर्क समिति दक्षिण कोरियाका अध्यक्ष श्री प्रसाद श्रेष्ठ, कोरियस्थित विभिन्न संघ-संस्थाका अध्यक्ष तथा प्रतिनिधिहरुले महाधिवेशन सफलताको शुभकामना सहित आ-आफ्नो मन्तव्य प्रस्तुत गरेका थिए ।
उदघाटन सत्रपछिको बन्द सत्रमा संस्थाका संरक्षक खोम प्रसाद गुरुङ संयोजकत्वमा बनेको निर्वाचन मण्डलले निर्वाचन सम्बन्धी सम्पूर्ण प्रक्रिया पूरा गर्दै नव गठित कार्यसमितिलाई सपथ ग्रहण गराएका थिए । कास्की परिवार दक्षिण कोरियाको सातौं अधिवेशनबाट अध्यक्षमा आरती ह्योल्मो, वरिष्ठ उपाध्यक्ष डा. किशन क्षेत्री, उपाध्यक्ष सन्तोष पौडेल, उपाध्यक्ष हिसप श्रेष्ठ, सचिव भरत सुवेदी, सहसचिव अशोक कुमार थापा, सहसचिव पुष्पकमल बराल, कोषाध्यक्ष सूर्यप्रसाद अधिकारी, सहकोषाध्यक्ष लोक बहादुर पुन र सदस्यहरुमा रामचन्द्र अधिकारी, राजेश सुवेदी, शिव पुन, शंकर गुरुङ सर्वसम्मत चयन भएका छन् ।
जूम भर्चुअलमा हिसप श्रेष्ठको विशेष प्राविधिक सहजीकरणसँगै कार्यक्रम सञ्चालन संस्थाका सचिव विनोद दाहालले गरेका थिए । कास्की परिवार दक्षिण कोरियाको सातौं ऐतिहासिक महाधिवेशलाई सफल बनाउन प्रत्यक्ष, अप्रत्यक्ष र जूम भर्चुअल मार्फत जोडिएर उपस्थित समस्त महानुभावहरुलाई कास्की परिवारले हार्दिक धन्यवाद व्यक्त गरेको छ ।
