कोरियामा राष्ट्रकवि जयन्ती विशेष कविता वाचन
२१ सेप्टेम्बर २०२१, सउल कोरिया ।
अनेसास कोरिया च्याप्टरले यही सेप्टेम्बर २६ तारिख अर्थात असोज १० गते राष्ट्रकवि जयन्ती विशेष कविता वाचन कार्यक्रम गर्ने भएको छ । सो कार्यक्रममा स्रष्टाहरूले राष्ट्रकविका जीवन्त कविताहरू वाचन गर्ने भएका छन् ।
चर्चित युवा छन्दकविहरूद्वारा राष्ट्रकविका अमर रचनाहरू कार्यक्रममा वाचन गरेर सुनाइने आयोजकले जनाएको छ । प्रखर कवि तथा समालोचक डा. देवी नेपालको प्रमुख आतिथ्यतामा सम्पन्न हुने सो कार्यक्रममा मूर्धन्य छन्दकवि कलानिधि दाहालको विशिष्ट आतिथ्य रहनेछ । त्यसैगरी अतिथि युवा स्रष्टाहरूमा क्रमश: सविता बराल, बलराम दाहाल, सागर के. सी., संगम संयोग, देवु लुइटेल र जनक सन्याल लगायतले राष्ट्रकविका अमर रचनाहरू वाचन गर्नेछन् ।
स्वच्छन्दतावादी भावधारा र परिष्कारवादी शैलीका धरोहर, नेपाली साहित्यको मध्यकालदेखि आधुनिककालसम्म निरन्तर रूपमा जीवनको अन्तिम समयसम्म क्रियाशील रही कविता, गीतिनाटक , कथा,अनुवाद , लेख, प्रबन्धजस्ता धेरै विधाहरूमा दीर्घसाधना गर्नुभएका नेपाली साहित्यका विराटप्रतिभा समादरणीय राष्ट्रकवि माधव घिमिरेको सम्मानमा गरिने स्मृति कार्यक्रममा राष्ट्रकविको व्यक्तिगत जीवन र कृतिबारे सम्झना गर्दै उनका जीवन्त रचनाहरू वाचन गरिने आयोजकले जनाएको छ । कोरिया च्याप्टरका अध्यक्ष प्रमोद सारंगको सभापतित्व र संयोजकत्वमा सम्पन्न हुने सो कार्यक्रममा च्याप्टरका महासचिव ह्यारी बोण्डले सहजकर्ताको भूमिका निर्वाह गर्नुहुनेछ ।
भाषासाहित्य, संगीत र कलाको विकास, विस्तार र उन्नयनमा अनवरत सक्रिय संस्था कोरिया च्याप्टरले स्रष्टा सम्मान , भानु जयन्ती, लक्ष्मी जयन्ती , मोतीजयन्तीलगायत विभिन्न कविता प्रतियोगिताहरू र सम्मेलनहरू गर्दै आएको छ भने लामो समयदेखि काव्य- सुधा नामक विश्वव्यापी साप्ताहिक रचना वाचन कार्यक्रम सम्पन्न गर्दै आइरहेको छ ।
