कोरियामा नौ देशको भूत परेडमा निस्कदै
दक्षिण कोरियामा सबै भन्दा ठूलो एशियाकै प्रतिनिधित्व गरेर विगत डेड दशकदेखि आयोजना गर्दै आएको सांस्कृतीक महोत्सव माइग्रेन्ट आरिराङ मल्टिकल्चर फेस्टिवल (माम्फ)मा यो वर्ष भूतको परेड निस्कने भएका छन् ।
माम्फमा होररपरेड ख्यङनाम माइग्रेन्ट सेन्टर र माम्फ आयोजक कमिटिले आयोजना गर्दै आएको माइग्रेन्ट आरिराङ मल्टिकल्चर फेस्टिवल (माम्फ२०२१) यहि अक्टोबर २२, २३ र २४ तारिख हुने भएको छ । कोरोनाको कारण गत वर्ष अनलाइन कार्यक्रम गरिएको माम्फ यो वर्ष भने अनलाइन र अफलाइन गरिने आयोजकले जनाएको छ ।
विगतका इतिहासलाई हेर्ने हो भने माम्फमा विभिन्न सहभागी देशहरुले आफ्नो मौलिक भेषभूषा र संस्कृति झल्कने झाँकीहरु प्रस्तृत गर्दै आएका थिए भने यो पटकको मुख्य आर्कषण नै विभिन्न नौ मुलुकको डरलाग्दो भूतहरुको प्रस्तुती रहेको होररपरेड रहेको छ । होररपरेडमा नेपाल, श्रीलंका, म्यान्मार, चीन, भियतनाम, कम्बोडिया, इन्डोनेशिया, फिलिपिन र मंगोलले सहभागिता जनाएका छन् ।
आफ्नो देशको भूतसँग सम्वन्धित कला संस्कृतिलाई देखाउन खोजिएको उक्त होररपरेड प्रतियोगितामा उत्कृष्ट सहभागीलाई पुरस्कारको समेत व्यवस्था गरिएको छ । यो वर्षको माम्फमा सहभागी सबै देशलाई भूतको थिम दिइएको होररपरेडमा नेपालले विश्वभरी कोरोनाबाट ज्यान गुमाएका हजारौं आत्माहरुको शान्तिको कामना गर्दै बत्ती बालेर प्रार्थना गरेको विषयलाई प्रस्तुत गरेको छ ।
यो वर्ष माम्फको प्रमुख अतिथि देश नेपाल रहेको छ । कोरियाको छाङवन शहरको सङसान आर्ट हलमा शुक्रबार, सनिबार र आइतबार तीन दिनसम्म हुने माम्फ महोत्सवमा कोरियाका चर्चित के पप कलाकारहरुको आकर्षक प्रस्तुति रहने भएको छ भने एसिया पप म्युजिक कन्सर्टमा नेपालको तर्फबाट सुरेन घताङले सहभागिता जनाउने भएका छन् ।
त्यसैगरी बालबालिकाहरुको आकर्षक नृत्य सहित विभिन्न कार्यक्रमहरु रहेका छन् । कार्यक्रम अनलाइन र अफलाइन दुवैबाट हुने भएकोले पनि सुरक्षाको दृष्टिकोणले आयोजक त्यतिकै सक्रिय रहेको छ । कोभिडको कारण कार्यक्रममा सिमित मात्रामा दर्शकको सहभागीता गराउनुको साथै सहभागीहरुले कोरोना विरुद्धको खोप नलगाएकाहरुले एक दिन अघि पिसीआर टेष्ट गरी रिपोर्ट देखाउनु पर्ने छ भने खोप लगाएकाहरुलाई नपर्ने जनाएको छ । तथा कार्यक्रममा सहभागी हुन चाहनेहरुले आफ्नो नाम, परिचयपत्र नम्बर वा पासपोर्ट नम्बर अगाडि नै टिपाइसक्नु पर्ने आयोजकले जनाएको छ ।
सन् २००५ मा सुरु भएको माम्फले कोरियाली आप्रवासीहरुको सांस्कृतिक अधिकार, सांस्कृतिक विविधताको पहिचान गर्दै कोरियाली समुदायमा विभिन्न मुलुकको संस्कृति, भेषभूषालाई प्रवद्र्धन गर्दै आप्रवासीहरुको सांस्कृतिक पहिचान, भेदभाव रहित मानव अधिकार र संवेदनशिलतालाई प्रोत्साहित गर्दछ । दक्षिण कोरियामा सबै भन्दा ठूलो एशियाकै प्रतिनिधित्व गरेर आयोजना गर्दै आएको उक्त महोत्सव सांस्कृतिक विविधता बोकेको महोत्सव हो । आगामि दिनहरुमा यसलाई अझ वृहद बनाउने आयोजकको लक्ष्य रहेको छ ।
