तमू धीं दक्षिण कोरिया जेजुदो शाखाको प्रथम अधिवेशनबाट निरु गुरुङ नेतृत्वको कार्यसमिति चयन
बोम्जन गुरुङ
२८ नोभेम्बर २०२१, सउल कोरिया ।
तमू धीं दक्षिण कोरिया जेजुदो शाखाको प्रथम अधिवेशन सम्पन्न भएको छ । उक्त अधिवेशनका संयोजक मान गुरुङको सभापतित्व र सोही संस्थाको केन्द्रीय अध्यक्ष लेसन गुरुङको प्रमुख आतिथ्यतामा सो अधिवेधन सम्पन्न भएको हो ।
संस्थाको सक्रिय व्यक्तित्व निरु गुरुङको स्वागत मन्तव्यसँगै शुरु भएको उक्त अधिवेशनमा कार्यक्रमका प्रमुख अतिथि तमू धीं दक्षिण कोरियाका केन्द्रीय अध्यक्ष लेसन गुरुङले आफ्नो भाषा, धर्म, संस्कृति र संरक्षणका निम्ति प्रत्येक तमूहरु जागरुक र जिम्मेवार हुनुपर्ने खाँचो औंल्याउँदै कोरियामा तेश्रो शाखा स्थापनाको ऐतिहासिक क्षणमा खुशी व्यक्त गरे ।
विशेष अतिथिहरुमा नेपाल आदिवासी जनजाति महासंघ दक्षिण कोरिया जेजुदो शाखा अध्यक्ष गजिन हाङस्रोङ लिम्बु, किराँत याक्थुङ चुम्लुङ जेजुदो शाखा प्रतिनिधि सुमन हाङ हेम्ब्या, तामाङ घेदुङ दक्षिण कोरिया जेजुदो शाखा प्रतिनिधि सुनिता तामाङ, तमू धीं दक्षिण कोरियाका वरिष्ठ उपाध्यक्ष रुपा गुरुङ र स्याङ्जा भिरकोट आठथर तमू समाजका अध्यक्ष तथा संस्थाका निवर्तमान खेलकुद संयोजक देवेन्द्र गुरुङ लगायतले अधिवेशन सफलताको शुभकामना सहित आ-आफ्नो मन्तव्य राखेका थिए । अन्य अतिथिहरुमा संस्थाका केन्द्रीय सहकोषाध्यक्ष दुर्गा गुरुङ, सदस्य रेशमलाल गुरुङ लगायत संस्था सम्बद्ध व्यक्तित्वहरु उपस्थित रहेका थिए ।
यो अधिवेशनसँगै तमू धीं दक्षिण कोरियाले आफ्नो तेश्रो शाखाको रुपमा जेजुदो शाखा विस्तार गरेको हो । बन्द सत्रमा कार्यक्रम संयोजक तथा सभापति मान गुरुङको संयोजकत्वमा बनेको निर्वाचन मण्डलले निर्वाचन सम्बन्धी सम्पूर्ण प्रक्रिया पूरा गर्दै नव गठित कार्यसमितिलाई सपथ ग्रहण गराएका थिए भने श्याम गुरुङले उद्घाटन सत्रमा कार्यक्रम सञ्चालन गरेका थिए ।
तमू धीं दक्षिण कोरिया जेजुदो शाखाको प्रथम अधिवेशनबाट अध्यक्षमा निरु गुरुङ, उपाध्यक्ष सुशिल घले गुरुङ, उपाध्यक्ष राजीव गुरुङ, सचिव रुपक गुरुङ, सहसचिव निशा गुरुङ, कोषाध्यक्ष जनकाशी गुरुङ, सहकोषाध्यक्ष विवश गुरुङ र सदस्यहरुमा कालु गुरुङ, सन्तोष गुरुङ, देव गुरुङ, राधिका गुरुङ, निल कुमारी गुरुङ, रबिना गुरुङ, रेखा गुरुङ, रोशनी गुरुङ, तोरन गुरुङ सर्वसम्मत चयन भएका छन् भने सल्लाहकारमा श्याम गुरुङ र मन गुरुङलाई चयन गरिएको छ ।
