कोरियाको किम्हे बुसानमा आउँदो जनवरी २ तारिख तमू ल्होसार मनाईदै

तमू धीं ख्यङ्साङ्नाम्दो शाखा दक्षिण कोरियाको आयोजनामा तमू (गुरुङ) समुदायको नयाँ वर्ष तथा महान् राष्ट्रिय पर्व तमू ल्होसार मनाउने भएको छ । आउँदो २०२२ जनवरी २ तारिख आइतबारको दिनमा किम्हे स्थित लुम्बिनी रेष्टुरेण्टुको हलमा शुभकामना आदानप्रदान, दिवा भोज (स्यों कैं) र विविध साँस्कृतिक कार्यक्रम आयोजना गरेर उक्त ल्होसार मनाउने भएको हो ।

तमू जातीको परम्परा र मान्यता अनुसार हरेक वर्ष वर्ग (ल्हो) फेरिने र सोही वर्ग चक्र अनुसार नयाँ वर्षको प्रारम्भ हुने भएकोले नयाँ वर्षको स्वागत गर्दै महान् पर्वको रुपमा धूमधामका साथ मनाउँदै आइरहेको प्रचलन अनुसार यस वर्ष बाघ बर्ग (तो ल्हो) लाई स्वागत र गाई वर्ग (ल्वो ल्हो) लाई विदाई गरिनेछ । प्रवासी भूमि दक्षिण कोरियामा हरेक वर्षको पहिलो आइतबारलाई तमू ल्होसार मनाउँदै आएको सन्दर्भ उल्लेख गर्दै मिष्ठान्न भोजनको व्यवस्था सहित सो कार्यक्रम मार्फत आफ्नो जातीय मौलिकपन झल्किने साँस्कृतिक प्रस्तुतिहरु रहने तमू धीं ख्यङ्साङ्नाम्दो शाखा दक्षिण कोरियाको अध्यक्ष कर्ण गुरुङले बताए ।

नयाँ भेरियन्ट ओमीक्रोन भाईरसको जोखिमबाट बच्न उच्च सतर्कता र स्वास्थ्य मापदण्डको नियमहरु पालना गर्दै यस तमू ल्होसारलाई सभ्य र भब्य रुपमा सफल बनाउन संस्था सम्बद्ध सम्पूर्ण व्यक्तित्वहरु, बुद्विजीवी, शुभचिन्तक, समस्त कोरियावासी दाजुभाई तथा दिदीबहिनीहरुलाई तमू धीं ख्यङ्साङ्नाम्दो शाखा दक्षिण कोरियाले उपस्थितिको लागि हार्दिक अनुरोध गरेको छ ।

तपसिल :
मिति : २०२२ जनवरी ०२, आइतबार
समय : दिनको ठिक १:०० बजे
स्थान : लुम्बिनी रेष्टुरेण्टु, किम्हे कोरिया