अनेसास कोरिया च्याप्टरद्वारा नयाँ वर्षको शुभकामना आदानप्रदान र रचना वाचन कार्यक्रम सम्पन्न
अनेसास कोरिया च्याप्टरको आयोजनामा अंग्रेजी नयाँ वर्ष २०२२ को शुभ अवसरमा शुभकामना आदानप्रदानसहित रचनावाचन कार्यक्रम भव्य रूपले सम्पन्न भएको छ । कार्यक्रम जुम अनलाईन भर्चुअल माध्यमबाट सम्पन्न भएको हो ।
कार्यक्रममा कविता, गजल र मुक्तक गरी तीनै विधाका अतिथि स्रष्टाहरूले आफ्ना सुन्दर रचनाहरू वाचन गरेका थिए । कार्यक्रममा स्रष्टाहरू क्रमश: विजयता भण्डारी, रोशन तिमिल्सिना, टि पि खनाल, भावना लामिछाने, कल्पना भुषाल कल्पित, विक्रम ढकाल अनुराग, राम सुवेदी रुसन, सरस्वती तिवारी, अमृता पोख्रेल लगायतले देशप्रेम , प्रवास-पीडा , अस्थिरता , जीवन-दर्शन, मायाप्रेम आदि भावले ओतप्रोत रचनाहरू वाचन गर्दै नयाँ वर्षको शुभकामना आदानप्रदान गरेका थिए ।
कोरिया च्याप्टर वरिष्ठ उपाध्यक्ष डि आर न्यौपाने सुर्यको सभापतित्वमा सम्पन्न सो कार्यक्रममा अनेसासका पुर्व अध्यक्ष पदम विश्वकर्माज्यूको प्रमुख आतिथ्य रहेको थियो। प्रमुख अतिथि विश्वकर्माले स्रष्टाहरूको रचना र वाचनको प्रशम्सा गर्दै आयोजक च्याप्टरको भाषा- साहित्यप्रतिको योगदान स्मरण गरेका थिए । कोरिया च्याप्टरका उपाध्यक्ष आर एन अधिकारीले स्वागत मन्त्वय राख्दै कार्यक्रमको औचित्यको बारेमा जानकारीको दिएका थिए । आयोजक च्याप्टरले स्रष्टाहरूलाई साधनाको कदर स्वरूप सम्मान -पत्र वितरण गरिएको थियो । कार्यक्रम सँस्थाका महासचिव ह्यारी बोण्डले सन्चालन गरेका थिए ।
नेपाली भाषासाहित्य, संगीत र कलाको विकास, विस्तार र उन्नयनमा अनवरत सक्रिय संस्था कोरिया च्याप्टरले स्रष्टा सम्मान , भानु जयन्ती, लक्ष्मी जयन्ती , मोती जयन्तीलगायत विभिन्न अवसरमा साहित्यिक कार्यक्रमका साथै कविता प्रतियोगिताहरू र सम्मेलनहरू गर्दै आएको छ भने लामो समयदेखि काव्य- सुधा नामक विश्वव्यापी साप्ताहिक रचना वाचन कार्यक्रम सम्पन्न गर्दै आइरहेको छ ।
