सउल नेपाल गुम्बाले पाचौं वार्षिकोत्सब मनायो
थेग्छेन छ्योइलिङ सउल नेपाल गुम्बाले आफ्नो पाचौं वार्षिकोत्वस विशेष धार्मिक पूजापाठ गरि ९ तारिख आईतबार मनाएको छ ।
यो गुम्बा सन् २०१९ को अप्रिल १५ तारिख बैधानिक रूपमा कोरियामा दर्ता भएको पहिलो नेपाली धार्मिक संस्था हो । दक्षिण कोरियाको प्रसिध्द शहर गाङनाममा अवस्थित गुम्बा मै आर्य ताराको पूजा गरि वार्षिकोत्सब कार्यक्रम सम्पन्न गरिएको सउल नेपाल गुम्बाका लामा प्रमुख कुन्साङ दोर्जे लामाले बताउनुभयो ।
सन् २०१७ जनवरी ८ तारिखका दिन दक्षिण कोरियाका लागि नेपाली राजदुतवास निवर्तमान उपनियोग प्रमुख किरण शाक्यले उद्घाटन गरेका थिए । उक्त दिनको अवसर पारेर गुम्बाले प्रत्येक वर्ष विविध साँस्कृतिक कार्यक्रमहरू आयोजना गरेर वार्षिकोत्सब मनाउथ्यो ।
पछिल्लो समयमा दक्षिण कोरियामा पनि कोरोनाको नयाँ भेरियन्ट ओमिक्रोनको संक्रमण देखिनथाले यता बाक्लो संख्यामा सहभागी रहने कार्यक्रम गर्न कोरियन सरकारको कडा प्रतिबन्धले सामान्य पूजापाठ गरेर मनाएको समेत गुम्बाका प्रमुख लामाले बताउनुभयो ।
साथै गुम्बाले पूजामार्फत कोरियाली तथा नेपाली विभिन्न संघ संस्था, प्रतिनिधि, नेपाली व्यापारी, बिध्यार्थी, दाजू–भाई तथा दिदीबहिनीहरूमा अंग्रेजी नयाँ वर्ष २०२२ को शुभकामना व्यक्त गरेका छन् ।