सिन्धुपाल्चोकमा सामूहिक बृहत तमू तो ल्होसार भव्य रुपमा मनाईयो
मनु कोन्मे गुरुङ, पोखरा
सिन्धुपाल्चोक जिल्लाका ४२ गाउँका तमूहरुले (गुरुङ) सामुहिक तमु तो ल्होसार बाह्रबिसे नगरपालिका वडा नं.२ काभ्रे गुरुङ टोलमा भव्यरुपमा मनाएका छ्न् । सिन्धुपाल्चोक जिल्लाका ४२ (बयालिस) गाउँका तमूहरु (गुरुङ) मिलि गत वर्ष देखी तमू ल्होसार कार्यक्रम पालै पालो छुट्टै छुट्टै स्थानमा मनाउने निर्णयका साथ यो बर्ष तमु तो ल्होसार कार्यक्रम बाह्रबिसे नगरपालिका वडा नं. २ को काभ्रे गुरुङ टोलमा तमु ह्युल छोज धीं गुरुङ राष्ट्रिय परिषद सिन्धुपाल्चोकका वरिष्ठ उपाध्यक्ष धन बहादुर गुरुङ (डिबि) को संयोजकत्वमा मनाएको हो ।
कार्यक्रम बाह्रबिसे नगरपालिकाका प्रमुख निमोफुन्जु शेर्पाको प्रमुख आतिथ्यमा र तमू ह्युल छोंज धीँ गुरुङ राष्ट्रिय परिषद सिन्धुपाल्चोकका अध्यक्ष रबि गुरुङको अध्यक्षतामा र वडा नं.२ का वडाध्यक्ष बम बहादुर तामाङको बिशेष आतिथ्यमा सम्पन्न भएको थियो । औपचारिक कार्यक्रम अतिथिको असनग्रहण बाट शुरूवात भएको थियो । कार्यक्रममा समाजका शिव बहादुर गुरुङ लाई सम्मान गरेको थियो । प्रमुख अतिथि बाह्रबिसे नगरपालिका प्रमुख निमोफुन्जु शेर्पा र बिशेष अतिथि र अतिथिहरुले दिप प्रज्ज्वलन गरि कार्यक्रम उद्घाटन गरेका थिए ।
कार्यक्रम उद्घाटन संगै बौद्ध गुरुहरुले प्रवचन दिएका थिए । कार्यक्रममा स्वागत मन्तव्य तमु ह्युल छोँज धीं गुरुङ राष्ट्रिय परिषद सिन्धुपाल्चोक जिल्लाका वरिष्ठ उपाध्यक्ष एवं बृहत् तमु तो ल्होसार कार्यक्रमका संयोजक धन बहादुर गुरुङले राखेका थिए भने स्थानीय कलाकारहरुले स्वागत नृत्य प्रस्तुत गरेको थिए ।
उक्त कार्यक्रममा शुभकामना मन्तव्य प्रमुख अतिथि बाह्रबिसे नगरपालिकाका प्रमुख निमोफुन्जु शेर्पा,तमु ह्युल छोंज धीँ गुरुङ राष्ट्रिय परिषदका सचिव पान बहादुर गुरुङ र सिन्धुपाल्चोक बाह्र्बिसे नगरपालिका वडा नं.२ का वडाध्यक्ष बम बहादुर तामाङले शुभकामना मन्तव्य राखेका थिए ।
कार्यक्रममा अतिथि कलाकार गायक पृथ्वी गुरुङ ,आइतराम गुरुङ, गायक सबिन गुरुङ,गायिका सपना गुरुङ र गायक सरोज लामिछानेले आ-आफ्नो प्रस्तुति दिएर कार्यक्रममा उपस्थित दर्शकहरू लाई नचाएका थिए । त्यसैगरी राष्ट्रिय कलाकार जादुगर शेर बहादुर गुरुङले उपस्थित सबैलाई नचाउनुको साथै जादु देखाएर उपस्थित सबै लाई चकित पारेका थिए भने घाटु नृत्य,मन्जु श्री नृत्य,अतिथि कलाकारहरु र स्थानीय कलाकारहरुको बिजोड प्रस्तुतिका साथ दर्शकहरु लाई अझ मनोरञ्जन दिएका थिए ।
चलचित्रका निर्माता एवं नायक तथा तमु ह्युल छोँज धीं गुरुङ राष्ट्रिय परिषद सिन्धुपाल्चोकका सदस्य भिजन गुरुङले अतिथि कलाकार तथा स्थानीय कलाकारहरुको संयोजकत्व गरेका थिए भने काठमाण्डौ बाट अतिथि पाहुनाहरु सहित ठूलो संख्यामा तमु तो ल्होसार मनाउन सिन्धुपाल्चोकको बाह्रबिसे – २ काभ्रे गुरुङ टोल पुगेका थिए । उक्त सामुहिक बृहत तमु तो ल्होसार कार्यक्रम समापन कार्यक्रमका अध्यक्ष तमु ह्युल छोंज धीं गुरुङ राष्ट्रिय परिषद सिन्धुपाल्चोकका अध्यक्ष रबि गुरुङले ल्होसारको शुभकामना दिंदै उपस्थित सम्पुर्णलाई धन्यवाद दिएका थिए ।
