कोरियन प्रहरीद्धारा नेपाली महिला कामदार सम्मानित
फोनिज कोरिया संवाददाता
सोल-कोरियन प्रहरी कार्यालयले रोजगार अनुमति प्रणाली (ईपीएस) बाट रोजगारी गर्न यहाँ आएकी एक नेपाली महिला कामदारलाई सम्मान गरेको छ ।
कुमि नगरपालिका प्रहरी कार्यालयले त्यस क्षेत्रको सामाजिक सुरक्षामा उल्लेखनीय सहयोग पुर्याए बापत सुनसरी इटहरीकी सरिता खवासलाई सम्मान पत्र प्रदान गरेको हो । प्रहरीले गत अप्रीलमा सम्मान गर्ने निर्णय गरेको भए पनि खवासले आफ्नो व्यस्तताका कारण सामान–पत्र केहिदिन अघिमात्र ग्रहण गरेकी थिइन् ।
कुमि बिश्वबिद्यालयमा आयोजना गरिएको एक कार्यक्रममा सम्मान पत्र हस्तान्तरण गरिएको थियो । सम्मान पत्रमा कुमि बिश्वविद्यालयमा अध्ययन गरिरहेका बिदेशी बिद्यार्थीहरुको अभिभावकत्व निर्वाह गर्न जिम्मेवारी पनि दिइएको छ ।
खवास २००८ को डिसेम्बरमा ईपीएसबाट पहिलो पटक कोरिया आएकी हुन् । उनि गिम्छनस्थित हान सुङ नामक धागो कम्पनीमा कार्यरत छिन् । कम्पनीमा सबभन्दा मिहेनती र ईमान्दार भएकाले उनलाई अरु ४ बर्ष १० महिनाको रोजगार अवधि थप गरि दिएको छ ।
मिहेनती र इमान्दार भएकैले कम्पनीले खवास दक्ष कामदारका लागि अध्ययन गर्न कुमि बिश्वविद्यालयमा दुई बर्ष अघि सिफारिस गरेको थियो । अत्यन्तै मिहेनती खवास राती कम्पनीमा काम गरेर दिउसो कलेज जाने गर्छिन् ।
सरकारले निर्धारण गरे अनुसारको कोरियन भाषा उतीर्ण गरे खवासले दक्ष कामदारको दर्जा पाउनेछिन् । खवास कोरियन प्रहरीद्धारा सम्मान र जिम्मेवारी पाउने सम्भवत पहिलो नेपाली महिला कामदार पनि हुन् ।
